Prezıdent Ákimshiliginiń memlekettik ınspektory Túrkistan oblysyndaǵy shalǵaı aýyldardy aralady

TÚRKІSTAN. QazAqparat - QR Prezıdenti Ákimshiliginiń memlekettik ınspektory Serik Qojanııazov Túrkistan oblysy Keles aýdanynda jumys saparmen boldy. Sapar barysynda ol elimizde jarııalanǵan tótenshe jaǵdaıǵa baılanysty aýdanda atqarylyp jatqan jumystardyń legimen tanysty, dep habarlaıdy QazAqparat óńir basshysynyń baspasóz qyzmetine silteme jasap.

Memlekettik ınspektor eń aldymen «Qazaqstan Halyq banki» aýdandyq fılıalynda bolyp, jumys barysyn baqylady. Bank ǵımaratynyń halyqqa qolaısyz jerde ornalasqanyn aıtyp, jańa ǵımarat salý máselesin kóterdi. Kólik kóp ótetin kúre joldyń boıynda ornalasqan ǵımaratty kóshirý kerektigin eskertti.

Halyq arasynda medıtsınalyq maska men antıseptıkterge suranys joǵary bolǵandyqtan Serik Qojanııazov aýdan ortalyǵyndaǵy dárihanalardy aralap, ondaǵy jaǵdaıdy tekserdi. Jaǵdaı turaqty. Keles aýdanynyń ákimi Aqmentaı Esbaev jergilikti kásipkerlerlerdiń kómegimen, eriktilerdiń atsalysýymen, qorda qosymsha 50 myńdaı betperdeniń bar ekenin atap ótti.

Memlekettik ınspektor aýdandyq «Qazposhta» men jumyspen qamtý ortalyǵyn jáne birqatar saýda oryndaryn aralap, ondaǵy saqtyq sharalarynyń saqtalýyn tekserdi. Jaýaptylarǵa tıisti tapsyrma berdi.

Sondaı-aq, ınternet júıesi jetpegen Ózbekstan Respýblıkasymen shekaralas jatqan 4 aýyldyq okrýginiń 10 eldi meken halqynyń tynys-tirshiligimen tanysty. Ondaǵy 20 myńǵa jýyq turǵynnyń máselesin Serik Qojanııazov jeke baqylaýyna alatyn boldy.