Prezıdent Ákimshiliginiń Basshysy Aqmola oblysynyń jańa ákimin tanystyrdy
Kezdesý barysynda Oljas Bektenov depýtattarǵa Aqmola oblysynyń ákimi laýazymyna Marat Muratuly Ahmetjanov pen Murat Saǵatuly Balpannyń kandıdatýrasyn usyný týraly Prezıdenttiń hatyn oqyp berdi. Ashyq daýys berýdiń nátıjesinde 177 depýtat Marat Ahmetjanovtyń, 73 depýtat Murat Balpannyń kandıdatýrasyn qoldap, daýys berdi. Jınalysqa barlyǵy 250 depýtat qatysty. Daýys berý qorytyndysy boıynsha Prezıdent Jarlyǵymen Ahmetjanov Marat Muratuly Aqmola oblysynyń ákimi bolyp taǵaıyndaldy.
Óńir aktıvine jańa ákimdi tanystyrǵan Oljas Bektenov Marat Ahmetjanovtyń quqyq qorǵaý jáne qadaǵalaý salalarynda túrli basshylyq qyzmetterdi tıimdi atqarǵan tájirıbeli basshy ekenin atap ótti. Oljas Bektenov oblys basshylyǵy Prezıdenttiń halyqqa Joldaýynda kórsetilgen mindetterdi iske asyrýǵa kúsh salýy qajet ekenin aıtty. Aqmola oblysynyń ákimdigi óńir ekonomıkasyn damytý, azamattardy sapaly aýyzsýmen qamtamasyz etý, oblys ortalyǵyndaǵy jylý energııasynyń tapshylyǵyn joıý, medıtsına salasyn damytý, turǵyndardy áleýmettik ınfraqurylymmen qamtamasyz etý, týrıstik áleýetti nyǵaıtý, elorda mańyndaǵy aýmaqtardy damytý jáne basqa da mańyzdy baǵyttar boıynsha belsendi jumys isteýi kerek. Oljas Bektenov jergilikti atqarýshy organdardyń jumysy azamattarmen tabysty baılanys ornatýǵa jáne Memleket basshysynyń tapsyrmalaryn júzege asyrýǵa negizdelýi qajet ekenine nazar aýdardy.
Kezdesý sońynda Oljas Bektenov Marat Ahmetjanovqa oblys turǵyndarynyń ıgiligi úshin Prezıdent júktegen barlyq mindetti oryndaý jolynda tabys tiledi, sondaı-aq aımaqtyń burynǵy basshysy Ermek Marjyqpaevqa atqarǵan jumysy úshin alǵys aıtty.