Prezıdent Ákimshiligine el turǵyndary qandaı máselemen jıi shaǵymdanady
Málim etilgendeı, Batys Qazaqstan oblysynyń Oral qalasyna kóshpeli qabyldaý (22 adam) da uıymdastyrylǵan. Budan bólek, óńir turǵyndaryna qolaıly bolýy úshin, barlyq oblystar men Almaty jáne Shymkent qalalarynyń ákimdikterin selektorlyq júıege qosa otyryp, 75 adamnyń ótinishi qarastyryldy.
Ótinishterdiń basym bóligi Nur-Sultan (37,4%) men Almaty (9,2%) qalalary, Batys Qazaqstan (7,7%) jáne Qaraǵandy (6,2%) oblystary men Shymkent (5,4%) qalasynyń turǵyndarynan túsken. Atap aıtqanda, Nur-Sultannan – 150 adam, Almaty qalasynan – 37, BQO-dan – 31, Qaraǵandy oblysynan – 25, Shymkent qalasynan – 22, Aqmola oblysynan – 22, ShQO-dan – 21, Mańǵystaý oblysynan – 15, Almaty oblysynan – 13, Pavlodar oblysynan – 11, Jambyl oblysynan – 10, Túrkistan oblysynan – 10, Qostanaı oblysynan – 10, SQO-dan – 8, Qyzylorda oblysynan – 5, Aqtóbe oblysynan – 4 jáne Atyraý oblysynan 2 azamat júgingen.
«Azamattar kóbinese quqyq qorǵaý organdary (33%) men sot organdarynyń (16%) qyzmetine, jergilikti atqarýshy organdardyń jumysyna (29%) qatysty, bank salasyna (8,2%), densaýly saqtaý salasyna (2,6%), zeınetpen qamtý salasyna (2%) qatysty aryz-shaǵymdar túsirip jatady. Basqa da sabaqtas máseleler 20% shamasynda. Qabyldaýǵa jazylmaqshy nıettegi adamdardyń sany arta túsýine baılanysty qazirgi shaqta qaıta qabyldaýlardy qysqartý sharalary qarastyrylyp jatyr. Osy maqsatta qaıta qabyldaýǵa jazylǵan azamattardyń ótinishteri saraptaýdan ótkizildi.
Bıylǵy naýryz aıyna túsken 150 shaǵymdy teksergende, onyń ishinde 47 adamnyń, tyńǵylyqty jaýap alǵanyna nemese shaǵymdarynyń negizdi túrde qanaǵattandyrylmaǵanyna qaramastan, qaıta shaǵymdanǵany belgili boldy», - dedi QR Prezıdenti Ákimshiligi Ótinishterdi qarastyrýdy qadaǵalaý bóliminen.
Esepti kezeńde táýelsiz zańgerler, memlekettik organdar bergen jaýaptarǵa jasalǵan saraptama negizinde, 36 qorytyndy daıyndap shyqqan. «Qazirgi ýaqytta osyndaı jumys sáýir-mamyr aıyna qabyldaýǵa jazylǵan ótinishterge de qatysty júrgizilip jatyr. Jalpy alǵanda, júrgizilgen keshendi sharalardyń arqasynda, QR PÁ qabyldaýyna ótinish túsirgen azamattardyń problemalaryn sheshý barysynda jaǵymdy ózgerister bolǵany baıqalady», - delingen aqparatta.