Prezıdent Ákimshiligi Ótinishterdi qaraýdy baqylaý bólimi biryńǵaı qabyldaý ótkizdi
Eldegi epıdemıologııalyq ahýaldan týyndaǵan shekteýlerge baılanysty azamattardy qabyldaý beınebaılanys júıesi arqyly qashyqtan ótkizildi. Aıta keterligi, bólimniń bastamasymen bıylǵy shilde aıynan beri Biryńǵaı qabyldaý kúnderi ár aıdyń sońǵy jumasynda ótkizile bastady.
Prezıdent Ákimshiliginiń Ótinishterdi qaraýdy baqylaý bólimi daıyndaǵan jańa reglamentke sáıkes, ótinish ıesine qabyldaý kúninde naqty da dáleldi jaýap berý úshin qabyldaýǵa jazylǵan azamattar kóteretin suraqtar mindetti túrde aldyn-ala pysyqtalatyn bolady. Eger kóterilgen suraq jergilikti atqarýshy organnyń quzyretine kirmeıtin bolsa, máseleni birlese qarastyryp sheshý úshin qabyldaýǵa ortalyq memlekettik organdardyń, prokýratýra men ishki ister organynyń ókilderi shaqyrylady.
Barynsha kúrdeli máseleler qarastyrylsa, oǵan Prezıdent Kómekshisi de aralasady.
28 tamyz kúni ótkizilgen jańa formattaǵy Biryńǵaı qabyldaý kúninde Nur-Sultan, Almaty, Shymkent qalalarynyń jáne oblystardyń ákimderi men ákim orynbasarlary 80-nen astam azamatty qabyldady. Prezıdenttiń Kómekshisi Tamara Dúısenova Nur-Sultan, Shymkent qalalary men Batys Qazaqstan, Qyzylorda oblystarynda ótken qabyldaýlarǵa beınebaılanys arqyly qatysty.
Ótinish ıeleri baspanamen qamtamasyz etý, turǵyn-úı kommýnaldyq sharýashylyǵy, eldi-mekenderdi abattandyrý, materıaldyq kómek kórsetý jáne basqa da máselelerdi kóterdi.
Іs-shara Memleket basshysy «halyq únine qulaq asatyn memleket» tujyrymdamasyn ilgeriletý boıynsha júktegen mindetterdi iske asyrý aıasynda jergilikti atqarýshy organdardyń azamattar ótinishterimen jumysyn jandandyrýǵa baǵyttalǵan.