Prezıdent ákimdikke elordada biregeı ǵımarattar salý isin qolǵa alýdy tapsyrdy

ASTANA. QazAqparat – Elordany damytý máseleleri jónindegi keńeste Memleket basshysy Qasym-Jomart Toqaev Astanada biregeı ári tartymdy nysandar salý boıynsha tapsyrma berdi, dep habarlaıdy QazAqparat tilshisi.

«Buǵan deıin men Esil ózeniniń jaǵalaýyn, EKSPO aýmaǵyn jáne qalanyń basqa da aýdandaryn abattandyrýdy tapsyrǵan edim. Bedeldi jergilikti jáne álemdik sarapshylardy, ýrbanısterdi tarta otyryp, osy baǵytta jańa usynystar ázirleý qajet. Sonymen qatar, elordada biregeı nysandardy salý toqtady. Kerisinshe, turǵyn úı qurylysyna tym kóp kóńil bólinip ketti. Bir kezderi bıznes ókilderiniń qoldaýymen «Abý-Dabı Plaza», «Han Shatyr», «Talan Towers» sııaqty keshender boı kóterdi. Olar búginde Astananyń sımvolyna aınaldy. Ákimdik osy tásildi qaıta qoldanyp, qalada jańa kórikti keshenderdi salý úshin jeke ınvestorlar men tanymal sáýletshilerdi tartýy qajet», - dep tapsyrma júktedi Memleket basshysy.

Qasym-Jomart Toqaev qala beınesi birinshi kezekte eldiń bedeline áser etetinin basa aıtty.

«Qala qurylysy eń aldymen úlken óner ekenin jáne onyń memleket bedeline áser etetinin este ustaǵan jón. Qazirgi álemde sulýlyq ómirge úılesim syılap, qalanyń sımvoldyq kapıtalyn arttyrady, talanttar men ınvestıtsııa tartýǵa yqpal etedi. Sonymen qatar, zamanaýı sándi ári tartymdy ǵımarattar men oılastyrylyp jasalǵan kósheler, abattandyrylǵan aýlalar qala turǵyndarynyń ómir súrý sapasynyń ajyramas bóligi sanalady», - dep málem etti Prezıdent.

Buǵan qosa, Prezıdent keńeste elordada úshinshi kópsalaly aýrýhana salý usynysyna qoldaý kórsetti.