Prezıdent Ahýaldyq ortalyqtyń jumysymen tanysty

<p>ASTANA. KAZINFORM &ndash; Memleket basshysy Almaty qalasynyń tynys-tirshiligi týraly jan-jaqty aqparat beretin Ahýaldyq ortalyqty aralap kórdi - dep habarlaıdy Aqordanyń baspasóz qyzmeti.&nbsp;</p>

Qasym-Jomart Toqaevqa qala ákimi Erbolat Dosaev atalǵan ortalyq Big Data taldaýy men Open Data tujyrymdamasyn engizý negizinde sapaly sheshimder qabyldaý úshin tıimdi qural bolatynyn aıtty.

Bul ortalyq megapolıstegi ómirdiń barlyq aspektisine qatysty derekterdi jınap, taldaýǵa, halyqty qulaqtandyrýǵa jáne qala bıliginiń turǵyndarmen aradaǵy keri baılanysyn qamtamasyz etýge múmkindik beredi. Qazirgi ýaqytta Almatynyń Ahýaldyq ortalyǵy qala tirshiliginiń barlyq salasyn qamtıtyn 53 modýlden turady. Derekter 50-den astam uıymnan, sondaı-aq memlekettik jáne qalalyq aqparattyq júıelerden (Ulttyq statıstıka bıýrosynyń saıty, «Qylmystyq quqyq buzýshylyqtar kartasy», «109 qyzmeti», «Biryńǵaı beınemonıtorıng júıesi», «Sergek», «Ońaı», Metropolıten, TJD jáne t.b.) jınalady.

Prezıdenttiń tapsyrmasyna sáıkes balalardyń qaýipsizdigine aıryqsha mán beriledi. Byltyr Almatydaǵy barlyq memlekettik mektep pen balabaqshalarda alǵash ret keshendi qaýipsizdik júıeleri engizildi. Memleket basshysyna onyń tsıfrlyq beınebaqylaý kameralary, dabyl túımeleri, órtke qarsy qaýipsizdik júıeleri, Face ID qondyrǵysy bar arnaıy týrnıketter sekildi 4 bólikten turatyny jóninde baıandaldy.

– Jasandy ıntellekt azamattardyń, atap aıtqanda, Almaty turǵyndarynyń ál-aýqatyn arttyrýǵa qyzmet etýge tıis. Sondyqtan men sizderdiń jasandy ıntellekt quraldaryn engizý josparyńyzdy qoldaımyn. Bul bir. Ekinshiden, qaladaǵy kólik jaǵdaıyna erekshe nazar aýdarý kerek. Muny anyq baıqaýǵa bolady. Bul – óte ózekti másele. Munda jasandy ıntellekt erekshe ról atqarýy kerek. Árıne, qaýipsizdikti nazardan tys qaldyrýǵa bolmaıdy. Qaýipsizdik birinshi orynda turýy kerek, – dedi Prezıdent.