Prezıdent AHQO-nyń sheteldegi nasıhatyn júrgizýmen aınalysyp keledi - Kelimbetov

ASTANA. QazAqparat - Astananyń aýystyrylýyna da, EKSPO kórmesiniń ótkizilýine de kúmándi kózqarastar kóp bolatyn. Alaıda ýaqyttyń ózi bul bastamalardyń ońdy bolǵanyn dáleldep berdi. "Astana" Halyqaralyq qarjy ortalyǵynyń basqarýshysy Qaırat Kelimbetov AHQO-nyń ashylý saltanatynda osylaı aıtty, dep habarlaıdy QazAqparat tilshisi.

"Halyqaralyq qarjy ortalyǵyn ashý úshin jumsalǵan 3 jyl - álemdegi ózge qarjy ortalyqtarymen salystyrǵanda qysqa ýaqyt dese bolady. Qazirgi kúni - Tórtinshi ındýstrııalyq revolıýtsııa kezinde jyldar túgili aılardyń ózi birshama sheshýshi kezeńge ıe. Osy rette ortalyqtyń ashylýyna tabandylyq tanytqan, álemdegi sońǵy trendterdi tolyq túsinip otyrǵan bizdiń kóshbasshymyzdyń erekshe qasıetterin atap ótkim keledi", - dedi AHQO basqarýshysy.

Qaırat Kelimbetovtyń aıtýynsha, 2015 jyldyń sońynda-aq Memleket basshysy Nıý-Iorktegi jáne Londondaǵy bıznes ókilderimen kezdesip, olardy "Astana" Halyqaralyq qarjy ortalyǵyna jumys isteýge shaqyrdy.

"Álbette, bul ıdeıaǵa áý basta kúmándi baǵa berilgen bolatyn. Kerek deseńiz, 20 jyl buryn Astanany aýystyrǵan kezde de, EKSPO kórmesin ótkizer aldynda da kúmándi kózqarastar bolǵanymen, osynyń bárine qaramastan, búgingi kúni Astana megapolısiniń tamsandyrarlyq jetistigin kórip otyrmyz. Elordanyń 20 jyldyq tarıhymen birge búgin "Astana" Halyqaralyq qarjy ortalyǵy ashylyp jatyr", - dedi ol.

AHQO basqarýshysy jańadan ashylyp otyrǵan ortalyq birneshe organnan - qarjylyq regýlıator, arbıtraj ortalyǵy, AHQO sotynan turatynyn tilge tıek etti.

"Memleket basshysy zańnama salasynda ondaǵan jylǵy tájirıbesi bar adamdardy osynda shaqyrdy. Osy qarqyndy saqtap qalýdyń mańyzy zor. Birqatar ekonomıster Qazaqstandaǵy reformalardy tildik kedergilerdi eńserýmen salystyrǵan edi. Ol da eńserildi. Prezıdenttiń ózi AHQO-nyń sheteldegi nasıhatyn júrgizýmen aınalysyp keledi. Bıyl ǵana AQSh-qa resmı sapary kezinde Nıý-Iorktegi bıznes ókilderimen kezdesti. Onda Ortalyq Azııa elderiniń basshylarymen, Eýrazııalyq ekonomıkalyq odaqqa múshe memleketterdiń basshylarymen jáne ShYU-ǵa múshe elderdiń basshylarymen, Qytaı basshysymen kezdesti jáne AHQO - Ortalyq Azııa úshin aımaqtyq hab bolýy kerektigin atap ótken bolatyn. Astananyń 20 jyldyq tarıhy - biz asqaq asýlardy baǵyndyra alatynymyzdy dáleldep berdi", - dep túıdi Qaırat Kelimbetov.

Eske sala ketsek, elordadaǵy Kongress holl ortalyǵynda Elbasy Nursultan Nazarbaevtyń qatysýymen «Astana» halyqaralyq qarjy ortalyǵynyń resmı ashylý rásimi ótti.