Prezıdent adamzattyń alǵash ǵaryshqa ushýy jaıly: Teńdessiz tarıhı qadam Qazaqstannyń qasıetti topyraǵynda jasaldy
19:09, 09 Sáýir 2021
NUR-SULTAN. QazAqparat - Búgin «Baıqońyr» ǵarysh aılaǵynda ıÝ.Gagarınniń ǵaryshqa alǵashqy ushýynyń 60 jyldyǵyna arnalǵan saltanatty májilis ótti, dep habarlaıdy Memleket basshysynyń baspasóz hatshysy Berik Ýálı Facebook-tegi paraqshasynda.
Memleket basshysy Qasym-Jomart Kemeluly osy aıtýly oqıǵaǵa baılanysty quttyqtaý joldady. Prezıdenttiń quttyqtaý hatyn Úkimet basshysy Asqar Mamın oqyp berdi.
«Qurmetti ǵarysh salasy mamandary jáne ardagerler! Sizderdi alda kele jatqan kásibı merekelerińiz – Ǵaryshkerler kúnimen quttyqtaımyn!
60 jyl buryn adamzat tarıhynda erekshe mańyzy bar aıtýly oqıǵa boldy. Ǵarysh keńistigine janqııarlyqpen túren salyndy. Keńes ǵaryshkeri ıÝrıı Alekseevıch Gagarınniń kók júzine samǵap, aspan álemine alǵash jol ashýy búkil álemdik ǵylymnyń aıryqsha serpinmen qaryshtap damýynyń jarqyn kórsetkishine aınaldy. Bul teńdessiz tarıhı qadam bizdiń elimizde, Qazaqstannyń qasıetti topyraǵynda jasaldy.
65 jyldan beri álemdegi eń iri ǵarysh aılaǵy bolyp sanalatyn «Baıqońyrdan» osy ýaqytqa deıin 150 ǵaryshker kókke kóterilip, ǵalamnyń sheksiz keńistigin baǵyndyryp qaıtty. Olardyń qatarynda qazaq ǵaryshkerleri Toqtar Áýbákirov, Talǵat Musabaev jáne Aıdyn Aıymbetov bar» delingen quttyqtaýda.
Odan bólek, quttyqtaý mátininde Prezıdent ǵarysh salasynyń mamandary men ardagerlerine alǵys bildirgen.
«Ǵalymdar men konstrýktorlardyń, synaqshylar men ınjenerlerdiń eren eńbegisiz ǵaryshty ıgerý múmkin emes. Osyǵan oraı, ǵarysh salasynyń mamandary men ardagerlerine shynaıy rızashylyǵymdy bildiremin. Sizderdiń kásibı biliktilikterińiz ben adal eńbekterińizdiń arqasynda zamanaýı ǵarysh salasy búgingi tańda laıyqty damyp keledi.
Qazaqstan men Reseıdiń belsendi ári jemisti yntymaqtastyǵy ǵaryshty zertteý jáne ǵaryshqa ushý salasyndaǵy birlesken jobalar men baǵdarlamalardy júzege asyrýǵa múmkindik beretinine senimim mol» dep jazǵan Memleket basshysy.
Sóz sońynda Qasym-Jomart Toqaev saltanatty jıynǵa qatysýshylarǵa zor densaýlyq, baq-bereke jáne jańa tabystar tiledi.