Prezıdent Abu Dhabi Ports Group bas dırektory Muhammed Ál-Shamısımen kezdesti

<p>ASTANA. KAZINFORM - Kezdesý barysynda ekijaqty yntymaqtastyqtyń perspektıvasy talqylandy, sondaı-aq kólik-logıstıka salasynda buǵan deıin qol jetkizilgen ýaǵdalastyqtardy júzege asyrý máselesi qarastyryldy.</p>

Prezıdent Qasym-Jomart Toqaev Abu Dhabi Ports kompanııasynyń birqatar iri nysan qurylysyna qatysty josparyna qoldaý kórsetip, bul bastamalar Qazaqstannyń Kaspıı teńizindegi aılaq jáne teńiz ınfraqurylymyn damytý jónindegi strategııalyq múddesine saı keletinin atap ótti.

Memleket basshysy kólik ınfraqurylymy men tasymal dálizderin damytý elimizdiń ornyqty ekonomıkalyq ósimin qamtamasyz etýde jáne halyqaralyq saýdany jandandyrýda erekshe ról atqaratynyn jetkizdi.

Muhammed Ál-Shamısı birlesken ınvestıtsııalyq jobalardy júzege asyrý barysynda udaıy qoldaý kórsetkeni úshin Qasym-Jomart Toqaevqa alǵys aıtty. Sondaı-aq Prezıdentke «Samuryq-Qazyna» qorymen jáne «Qazaqstan temir joly» ulttyq kompanııasymen tıimdi seriktestik ornatqany týraly málimet berdi.

Qasym-Jomart Toqaev pen Muhammed Ál-Shamısı birlesken jobalardyń tabysty júzege asatynyna senim bildirdi.

Buǵan deıin Memleket basshysy Masdar jáne ADNOC kompanııalarynyń dırektoryn qabyldady.