Prezıdent 100-ge kelgen maıdangerdi quttyqtap, alǵys hat joldady

PETROPAVL. QazAqparat – Soltústik Qazaqstan oblysynyń qurmetti azamaty, maıdanger, ólketanýshy, jazýshy Sergeı Presnıakov búgin 100 jasqa toldy, dep habarlaıdy QazAqparat tilshisi.

Petropavlda Ekinshi dúnıejúzilik soǵystyń ardageri Sergeı Presnıakovtyń mereıtoıyna oraı saltanatty jıyn ótti. Maıdangerge qurmet kórsetý kezinde SQO ákimi Qumar Aqsaqalov el Prezıdentiniń alǵys hatyn oqyp, tósbelgini tabys etti.

«Sergeı Mıhaılovıchtiń esimi Soltústik Qazaqstan oblysynyń tarıhyna altyn áriptermen jazylǵan. Sergeı Presnıakov – bizdiń el tarıhyndaǵy kóptegen oqıǵalardyń kýágeri jáne qatysýshysy. Ol Máskeý túbindegi shaıqastarda soǵysyp, 38 atqyshtar brıgadasynda qyzmet etti. Soǵystan keıin partııa organdarynda jumys istedi, ardagerler uıymyn basqardy.

Ómiriniń kóp bóligin bizdiń aımaqtyń tarıhyn zertteýge arnady. Soltústik Qazaqstannyń ólketanýynyń damýyna baǵa jetpes úles qosty. Stýdentterge ólketaný jáne týǵan ólke tarıhy kýrstarynan sabaq berdi. Onyń avtorlyǵymen jazylǵan kitaptar arqyly oqyrman el tarıhynan habardar bolady», - dedi óńir basshysy.

Sergeı Presnıakov kóptegen orden-medaldyń ıegeri, «Qurmet belgisi» ordenin ǵana 4 ret alǵan. Reseıdiń Samara oblysynyń týmasy SQO-ǵa shamamen 90 jyl buryn kelgen eken. Eńbek jolyn 1939 jyly Omby temirjoly Petropavl stansasynda ekonomıst bolyp bastaıdy. Kóp uzamaı soǵys bastalyp, 19 jasynda Sergeı Presnıakov maıdanǵa attanady. Batys, soltústik-batys maıdandary men Máskeý túbindegi shaıqastarǵa qatysady.

Soǵystan keıin ártúrli salada jumys istedi. Zeınet demalysyna shyqqasyn da qyzmetten qol úzbeı, Petropavl joǵary oqý ornynda týǵan ólke men Qazaqstan tarıhynan sabaq beredi. Ólke tarıhyn zertteýden de qol úzbeıdi. Sergeı Presnıakov 10-nan astam kitaptyń avtory. Sonyń ishinde 300-den astam maqala kirgen «Soltústik Qazaqstan oblysy» entsıklopedııasy da bar.

1980-shi jyldary Sergeı Presnıakov SQO ardagerler keńesiniń tóraǵasy bolǵan tusynda onyń bastamasymen Petropavlda Jeńis saıabaǵy paıda boldy.