Premera: Almatyda Joshy ulysy jaıly «Han Sultan. Altyn Orda» operasy qoıylady

<p>ALMATY. KAZINFORM - Abaı atyndaǵy Qazaq ulttyq opera jáne balet teatrynda 29-30 qarasha jáne 1 jeltoqsan kúnderi Joshy ulysynyń 800 jyldyǵyna oraı &laquo;Han Sultan. Altyn Orda&raquo; operalyq spektaklin qoıylady.</p>

Eki bólimnen turatyn tarıhı dramanyń kompozıtory – Hamıt Shańǵalıev, qoıýshy rejısser - ıtalıandyq Davıde Lıvermor. Tanymal jas qalamger Almas Núsiptiń «Han Sultan. Altyn Orda» dramalyq shyǵarmasynyń jelisimen jazylǵan lıbrettonyń avtory - Qazaqstan Respýblıkasynyń eńbek sińirgen qaıratkeri Maraltaı Ybyraev. Ideıa avtory - Abaı atyndaǵy Qazaqtyń ulttyq opera jáne balet teatrynyń dırektory Aınur Kópbasarova.

Foto: Dosbol Atajan / Kazinform

- Osy operany alǵash rejısserge usynǵanda tarıhyn tereńnen tartqan Joshy ulysyn, baı salt-dástúrimizdi, halqymyzǵa tán qasıetterdi, adamı qundylyqtardy basa kórsetýdi usyndym. Mysaly, Han Sultan sonaý Shyńǵys han bılep-tóstegen zamanda Uly dala qyzyna tán batyldyǵymen, erkindigimen, Reseı knıazdarymen dıplomatııalyq qarym-qatynas júrgizgen qabiletimen tarıhta qalǵan. Osyndaı túrki áleminiń analaryn búgingi urpaqqa nasıhattaý úshin biz Uly dalanyń qaısar qyzdaryn sahnalaýdy jalǵastyra berýimiz kerek dep oılaımyn, - dedi Abaı atyndaǵy QazUOBT dırektory Aınur Kópbasarova.

«Han Sultan.Altyn Orda» operasyna arnaıy 173 sahnalyq kıim tigilgen. Solıster, orkestr, hor, balet toptary jáne ózge qatysýshylardy qosqanda 300-ge jýyq ónerpazdar sahnada bas qosady.

- Bul operany tamashalaýǵa kelgen kórermen qazaqtyń únin estıdi. Men qoıylymǵa qanymda bar qazaqylyǵymdy qostym. Sebebi jazyp jatqan kezde klassıkalyq qatyp qalǵan qaǵıdattarǵa nege ózgeris engizbeske degen oı keldi. Árıne, sarapshylar tarapynan syn aıtylýy múmkin. Biraq ol da kerek nárse, men odan úlken sabaq alamyn, - dedi kompozıtor Hamıt Shańǵalıev.

Aıta ketken jón, operanyń bas keıipkeri Han Sultan – Joshy ulysynyń negizin qalaýshy Joshy hannyń úshinshi áıeli, Altyn Ordanyń bıleýshileriniń biri- Berke hannyń anasy. Qoıylym avtorlarynyń aıtýynsha, opera Shyńǵys hannyń musylman áleminiń úlken mádenıet oshaǵy, túrkilerdiń qurǵan úlken saıası birlestigi Horezmshah memleketin jaýlaý kezeńinen bastalyp, Altyn Ordanyń alǵash qalyptasa bastaǵan kezimen aıaqtalady.

Eske salaıyq, buǵan deıin Májilis depýtaty Rınat Zaıytov Abaı atyndaǵy opera jáne balet teatryn synǵa alǵanyn jazǵanbyz.