Premer-Mınıstrdiń orynbasary munaı baǵasynyń tómendeý múmkindigine túsinik berdi
Búgin Parlament Májilisindegi baspasóz máslıhatynda tilshiler munaı baǵasynyń tómendeýi múmkindigi týraly surady.
«Árıne, pessımıstik stsenarıdi de qarastyryp otyrmyz. Onyń aıasynda munaı quny barreline 60 dollarǵa deıin túsýi yqtımal... Meniń oıymsha, keler jyldyń birinshi toqsanynda jaǵdaı túsinikti bolady, ıaǵnı sol kezde Amerıkada jańa ákimshilik kelip, óziniń ekonomıkalyq is-sharalaryn jarııalaıdy. Bul rette túrli sarapshylar «saýda» soǵystary bolatyny jaıynda tujyrym jasap otyr. Amerıka ekonomıkasynyń ishki damýyna basa nazar aýdarylady degen pikirler bar», - dedi N. Baıbazarov.
Onyń sózine qaraǵanda, munaı baǵasyna saıası jaǵdaılar áser etedi. Degenmen bul salada ár tarap ustanatyn tıisti balans bar.
«Biz osyndaı jaǵdaılardy bastan ótkerdik. Tarıhqa kóz júgirtsek, eger munaı baǵasy aıtarlyqtaı tómendese, keıin ol kúrt kóteriledi. Óıtkeni ony óndirý kerek, ol úshin munaı ken oryndaryna únemi ınvestıtsııa salý qajet. Investıtsııasyz sala turalap qalady. Al ınvestıtsııa úshin teńdestirilgen munaı baǵasy qajet. Osynyń bárin eskere otyryp, barreline 75 dollar shamasyndaǵy dálizde qalamyz degen oıdamyn», - dedi mınıstr.
Qarasha aıynyń basynda AQSh-taǵy prezıdent saılaýynda Donald Tramp jeńiske jetkennen keıin álemdik qor naryqtarynda ósim baıqaldy.