Premer-Mınıstr: Munaı óndirisin jylyna eń kemi 11 mln tonna deńgeıde ustap turý — negizgi basymdyq

<p>ASTANA. KAZINFORM &ndash; Qazaqstan Premer-Mınıstri Oljas Bektenov &laquo;Shevron&raquo; kompanııasynyń Eýrazııalyq bólimshesiniń Basqarýshy dırektory Derek Magnesspen kezdesti. Bul týraly Úkimettiń baspasóz qyzmeti habarlady.&nbsp;</p>

Premer-Mınıstr Memleket basshysy Qasym-Jomart Toqaevtyń tapsyrmasy boıynsha respýblıkada aýqymdy ekonomıkalyq reformalar júrgizilip jatqanyn aıtty. Olar Jalpy ishki ónimniń jyl saıyn 6%-ǵa jáne odan da joǵary ósimin qamtamasyz etýi tıis.

«Úkimet ınvestorlarǵa ınvestıtsııalyq jobalardy damytý úshin barynsha qolaıly jaǵdaılar jasaıdy jáne qajetti qoldaý kórsetedi. Óz kezeginde biz seriktesterimizden jergilikti áleýetti barynsha paıdalanýdy, tehnologııalar transfertin, shıkizatty tereń óńdeýdi kózdeıtin birlesken josparlardy ýaqytyly iske asyrý boıynsha belsendi is-qımyldardy kútemiz», — dedi Oljas Bektenov.

Premer-Mınıstr Teńiz ken ornynda saǵalyq qysymdy basqarý jáne bolashaq keńeıtý jobalarynyń sáıkesinshe 2025 jyldyń birinshi jartyjyldyǵynda jáne 2024 jyldyń birinshi jartyjyldyǵynda aıaqtalýyn qamtamasyz etý kerektigin aıtty.

Sonymen qatar Premer-Mınıstr Úkimet Qarashyǵanaq ken ornyn ıgerýge úlken mán berip otyrǵanyn atap ótti. Bul rette munaı men kondensat óndirýdi jylyna eń kemi 11 mln tonna deńgeıinde ustap turý negizgi basymdyq bolyp tabylady.

«Qarashyǵanaqta qýaty jylyna 4 mlrd tekshe metrdi quraıtyn gaz óńdeý zaýytyn salý jobasyn iske asyrý týraly tujyrymdamalyq sheshim ken ornynyń bolashaq damýy úshin mańyzdy ekenin atap ótkim keledi», — dedi Oljas Bektenov.

Sonymen qatar Premer-Mınıstr ekonomıkalyq saıasattyń basymdyqtarynyń biri jergilikti qamtýdy damytý ekenine nazar aýdardy.

«Operatorlardyń qajettilikteri úshin ónim shyǵarýǵa múddeli jergilikti óndirýshilermen tyǵyz qarym-qatynas qajet. Bul rette eger elde qajetti taýarlar nemese jabdyqtar óndirilmese, onda biz osy óndiristerdi aldaǵy 2-3 jylda Qazaqstan aýmaǵynda lokalızatsııalaý jónindegi naqty josparlardy kórgimiz keledi. Sondyqtan osy baǵyttaǵy jumysty qaıta qaraýdy ótinemin», — dedi Úkimet basshysy.

Óz kezeginde Derek Magness «Shevron» kompanııasynyń Qazaqstanmen barlyq múddeli baǵyttar boıynsha yntymaqtastyqty nyǵaıtýǵa ázir ekenin rastady.

«Biz birge jumys istep, aradaǵy seriktestikti damytýǵa múddelimiz. «Shevron» Qazaqstannyń ekonomıkasyn damytý úshin jumsalyp jatqan kúsh-jigerdi qoldaıdy. Búginde ınvestıtsııalar men jańa jobalar úshin jaqsy jaǵdaılar jasalyp jatyr. Ózara seriktestikke negizdelgen bolashaqtaǵy damý múmkindikterin kórip otyrmyz», — dedi ol.