Premer-lıga: «Astana» týrnır kestesindegi jaǵdaıyn jaqsarta tústi

<p>ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 20-týrynyń alǵashqy oıyn kúni aıaqtaldy.</p>

Elordalyq «Astana» eýrokýbokqa qatysýyna baılanysty ózge komandalardan birneshe oıyndy az ótkizgen edi. Sonyń saldarynan týrnır kestesiniń ortasyna deıin túsip ketti. Bıyl bas júldege qol sozýdy qalap otyrǵan komanda árbir oıynda jeńiske jetý jolyn izdep keledi. 

Bul joly elordalyq ujym Petropavldyń «Qyzyljaryn» qabyldady. Kezdesý barysynda elordalyq klýbtan Djeffrı Chınedý 44, 57-mınýtta eki gol soqsa, oǵan petropavldyq komandadan Alekseı Şebetýn 45-mınýtta bir golmen jaýap qaıyrdy.

Osylaısha «Astana» qarsylasyn 2:1 esebimen tize búktirip, týrnır kestesindegi jaǵdaıyn odan ári jaqsarta tústi.

Sondaı-aq taǵy bir kezdesýde dál osyndaı eseppen túrkistandyq «Turan» óz alańynda Qaraǵandynyń «Shahterin» jeńdi. 

Eske salsaq, budan buryn elordalyq «Jeńis» Qyzylordanyń «Qaısaryn» 1:0 esebimen basym tústi.

Al 15 qyrkúıekte «Elimaı» (Semeı) men «Tobyl» (Qostanaı, «Aqtóbe» men «Jetisý» (Taldyqorǵan), «Ordabasy» (Shymkent) men «Atyraý» jasyl alańǵa shyǵady.