Premer-lıga: «Aqtóbe» men «Qaısar» teń tústi
Aqtóbelik klýb bıyl bas júldege qol sozýdy aldyna maqsat etip otyr. Dese de keıbir oıyndarda qarsylasyna ese jiberip, endigi birinde teń nátıjege qanaǵat bildirip júr. Olar búgin jeńiske jetken jaǵdaıda týrnır kestesinde birinshi orynǵa jaıǵasatyn edi.
Kezdesý barysynda aqtóbelik klýb tizgindi óz qolynda ustaýǵa tyrysty. Jyldam gol soǵýǵa umtylǵan olarǵa qyzylordalyq komanda laıyqty toıtarys berdi.
Oıynnyń 22-mınýtynda «Aqtóbe» sapynan Arman Keńesov kózdegen nysanadan múlt ketken joq. Olardyń tarapynan budan keıin de esepti ulǵaıtatyn birneshe múmkindigi bolǵan edi. Degenmen ony paıdalana alǵan joq.
Ekinshi kezeńde aqtóbelik fýtbolshylar esepti ulǵaıtýǵa tyrysty. Soǵan qaramastan qarsylastar qaqpasynan sańylaý taba alǵan joq. Esesine 60-mınýtta óz qaqpasy mańynda óreskel qatelik jiberip, ony qyzylordalyq komandadan Goran Mıloıko paıdalanyp ketti.
Osylaısha komandalar 1:1 esebine qanaǵat bildirdi.
Sondaı-aq 18 tamyzda syrt alańda «Tobyl» «Jetisýdy» 3:0, «Ordabasy» «Shahterdi» 3:2 esebimen tize búktirdi.
Al 17 tamyzda «Elimaı» «Turandy» 6:0, «Qaırat» «Qyzyljardy» 1:0 esebimen jeńdi.