Premer-Mınıstr: Jumys oryndaryn saqtaý boıynsha qadamdardy jalǵastyrý kerek
«7 aıdyń qorytyndysy boıynsha jalpy ishki ónimniń ósimi 2,7 paıyzǵa jedeldedi. Ósýdiń negizgi draıveri – ekonomıkanyń naqty sektory. Ósimniń turaqty serpini ónerkásiptegi, qurylystaǵy, sondaı-aq aýyl sharýashylyǵyndaǵy qarqyndy ósim qamtamasyz etti. Ónerkásiptegi 2,5 paıyzdyq ósý óńdeý ónerkásibindegi óndiristi 5,9 paıyzǵa ulǵaıtý esebinen qamtamasyz etildi. Óndiris qarqynynyń ósýine farmatsevtıka óndirisiniń 38,9, mashına jasaýdyń 22,7, onyń ishinde avtomobıl qurastyrýdyń 34,7, lokomotıvter men vagondar jasaýdyń 37,7, munaı óńdeýdiń 8, jeńil ónerkásiptiń 5,4, azyq-túlik óndirisiniń 3,9 jáne hımııa ónerkásibiniń 1,9 paıyzǵa ósýi áser etti. Qurylys salasynda 11,1 jáne turǵyn úıdi paıdalanýǵa berdiń 10,3 paıyz joǵary ósý qarqyny baıqalady», - dedi A. Mamın.
Onyń aıtýynsha, shekteý sharalarynyń saqtalyp otyrǵanyna qaramastan, 7 aıdyń qorytyndysy boıynsha saýda men baılanystaǵy oń ósý esebinen qyzmet kórsetý salasynda ósý qarqyny jaqsaryp, 2 paıyzdy qurady. Mal sharýashylyǵyndaǵy ornyqty ósý esebinen aýyl sharýashylyǵynda 2,4 paıyz deńgeıinde turaqty ósý qarqyny baıqalady.
«Negizgi kapıtalǵa salynatyn ınvestıtsııalardyń qalypqa kelý deńgeıi joǵary ekenin atap ótken jón. Taý-ken óndirisin eskermegende, bul kórsetkish 7 aıda 18,3 paıyzǵa ósti. Atap aıtqanda, negizgi kapıtalǵa salynatyn ınvestıtsııalardyń joǵary úlesi qurylysta, óńdeý ónerkásibinde, aqparat pen baılanysta, aýyl sharýashylyǵynda jáne saýdada», - dedi Úkimet basshysy.
Onyń sózine qaraǵanda, qańtar-shilde aılarynyń qorytyndysy boıynsha barlyq negizgi 7 makrokórsetkish boıynsha ósim - Almaty, Jambyl, Mańǵystaý oblystarynda jáne Shymkent qalasynda baıqaldy. 6 negizgi kórsetkish boıynsha ósim toǵyz óńirde: Aqmola, Aqtóbe, Qaraǵandy, Qostanaı, Qyzylorda, Pavlodar, Soltústik Qazaqstan,Túrkistan oblystary jáne Nur-Sultan qalasy. 5 kórsetkish boıynsha oń dınamıka úsh óńirde baıqalady. Ol - Atyraý, Shyǵys Qazaqstan oblystary men Almaty. Eń tómengi kórsetkishter Batys Qazaqstan oblysynda.
«Ákimdikter osy ósý qarqynyn tómendetpeýge tıis. Ósý serpinin saqtaý úshin ekonomıkany ártaraptandyrý, ınvestıtsııalar tartý jáne jumys oryndaryn saqtaý boıynsha jumysty jalǵastyrý qajet», - dedi A. Mamın.