Premer-Mınıstr Ulttyq sanaqty uıymdastyrý boıynsha tapsyrmalar berdi

NUR-SULTAN. QazAqparat – QR Premer-Mınıstri Asqar Mamın Úkimet otyrysynda Ulttyq sanaqqa sylbyr daıyndalyp jatqan óńirlerdi atady, dep habarlaıdy QazAqparat tilshisi.

«Jalpy sanaq ótkiziletin ýaqytta 32 myń adam jumysqa alynady. Almaty jáne Nur-Sultan qalalarynyń, Qostanaı jáne Shyǵys Qazaqstan oblystarynyń ákimdikteri jumysty durys jolǵa qoıǵan. Al Mańǵystaý, Aqtóbe oblystary men Shymkent qalasy ákimdikteriniń jumys qarqyny jetkiliksiz. Óńirlerdiń ákimderi halyq sanaǵyna daıyndyq barysyn jeke baqylaýǵa alsyn», - degen Úkimet basshysy sanaqty ótkizý boıynsha birqatar máselege toqtaldy.

«Birinshi. Óńirlerdiń ákimderi men Ulttyq statıstıka bıýrosy Eńbek jáne halyqty áleýmettik qorǵaý, Bilim jáne ǵylym, Densaýlyq saqtaý mınıstrlikterimen birge qysqa merzimde mindetti vaktsınatsııalaýdan ótken jumyskerlerdiń qajetti sanyn jumysqa ornalastyrýdy qamtamasyz etsin.

Ekinshi. Óńirlerdiń ákimderi, Ulttyq statıstıka bıýrosy jáne Іshki ister, Densaýlyq saqtaý mınıstrlikteri halyq sanaǵyn ótkizý boıynsha barlyq uıymdastyrýshylyq máselelerdi pysyqtasyn.

Úshinshi. Aqparat jáne qoǵamdyq damý mınıstrligi Ulttyq statıstıka bıýrosy jáne ákimdiktermen birge halyq arasynda ulttyq sanaqtyń júrgizilý maqsaty men tártibi týraly túsindirý jumystaryn kúsheıtsin», - deji Asqar Mamın.

Bul jumysty baqylaý men úılestirýdi ol orynbasary Álıhan Smaıylovqa tapsyrdy.