Premer-Mınıstr saýda jelileriniń basshylarymen keńes ótkizdi

NUR-SULTAN. QazAqparat – QR Premer-Mınıstri Asqar Mamın áleýmettik mańyzy bar taýarlar baǵasynyń turaqtylyǵyn jáne saýda ortalyqtarynda qolaıly sanıtarlyq-epıdemıologııalyq jaǵdaıdy qamtamasyz etý boıynsha aldyn alý is-sharalaryn ótkizý jóninde selektorlyq keńes ótkizdi. Bul týraly primeminister.kz habarlaıdy.

Respýblıkalyq mańyzy bar qalalar men oblystardyń iri saýda ortalyqtarynyń jumysy, sondaı-aq baǵa belgileý máseleleri týraly óńirlerdiń ákimderi, saýda jelileriniń ıeleri men basshylary baıandady. Saýda nysandarynda sanıtarlyq jáne dezınfektsııalyq sharalardy kúsheıtý jónindegi usynymdarmen densaýlyq saqtaý mınıstri E. Birtanov pen saýda jáne ıntegratsııa mınıstri B. Sultanov tanystyrdy.

«Qazirgi jaǵdaıdaǵy negizgi mindetter – azyq-túlik qaýipsizdigin qamtamasyz etý, áleýmettik mańyzy bar azyq-túlik ónimderine jáne alǵashqy qajettilik taýarlaryna baǵanyń ósine jol bermeý. Ákimdikter, iri kóterme saýda jetkizýshileri jáne saýda jelileriniń ıeleri halyq úshin qolaıly baǵalar boıynsha taýarlardy úzdiksiz jetkizýdi qamtamasyz etý maqsatynda tyǵyz ózara is-qımyl jasasýy qajet», — dedi A. Mamın.

Úkimet basshysy áleýmettik-kásipkerlik korporatsııalary men turaqtandyrý qorlarynyń resýrstaryn belsendi paıdalaný qajettigin atap ótti.

«Azyq-túlik taýarlaryn satatyn saýda nysandary halyqtyń tynys-tirshiligin qamtamasyz etýde mańyzdy oryn alady. Qaýipsizdik maqsatynda barlyq sanıtarlyq-epıdemıologııalyq normalardyń qamtamasyz etilýin qadaǵalaý qajet. Saýda nysandarynyń qyzmetkerleri barlyq qajetti sanıtarlyq jeke qorǵaný quraldarymen qamtamasyz etilýi tıis», — dedi A. Mamın.

Premer-Mınıstr áleýmettik mańyzy bar azyq-túlik ónimderi men alǵashqy qajettilik zattary baǵasynyń turaqtylyǵyn qamtamasyz etý asa mańyzdy ekenin atap ótti.