Premer-Mınıstr ruqsatsyz qoqys tógiletin jerlerdiń bárin jabýdy tapsyrdy
«Birinshiden, Ekologııa mınıstrligi óńirlerdiń ákimdikterimen birlesip, Jol kartalarynyń is-sharalary belgilengen merzimde oryndalýyn qamtamasyz etsin. Jumystyń oryndalýyna naqty monıtorıng júrgizsin jáne turaqty negizde halyqpen kezdesý ótkizsin. Ekinshiden, ekologııa máselelerin sheshýde qoqysty ruqsatsyz tógýdi jáne polıgondardy baqylaý máselesi mańyzdy faktor. Búgingi kúni óńirlerde qatty turmystyq qaldyqty jetkizýge arnalǵan 3,5 myń oryn bar. Onyń ishinde tek 620 ǵana olarǵa talapqa saı. Ekologııa mınıstrligine óńirlerdiń ákimdikterimen birlesip, ruqsatsyz qoqys tógilgen jerdiń bárin jabý jóninde pármendi sharalar qabyldaýdy jáne de resýrsy sarqylǵan polıgondardy jabýdy tapsyramyn», - dedi Asqar Mamın.
Úkimet basshysy úshinshiden Qazaqstan 2016 jyly Klımatqa qatysty Parıj kelisimin ratıfıkatsııalaǵanyn, parnıktik gazdar shyǵaryndylaryn 1990 jylǵy deńgeıden 2030 jyly 15 paıyzǵa qysqartý jóninde sózsiz mindettemelerdi qabyldaǵanyn eske saldy. Ol úshin qazirgi ýaqytta 2050 jylǵa deıingi Qazaqstannyń tómen kómirtekti damý tujyrymdamasy ázirlenip jatyr.
«Qabyldanǵan halyqaralyq mindettemelerdi oryndaý úshin qazirden bastap parnık gazynyń shyǵaryndy ósimin tómendetý jónindegi jumys qarqynyn údetý kerek. Osyǵan oraı Ekologııa mınıstrligi múddeli memlekettik organdarmen jáne qoǵamdyq uıymdarmen birlesip, Tujyrymdamany ázirleýdi tezdetsin jáne onyń jobasyn kelesi jyldyń ekinshi toqsanynda Úkimetke engizsin», - dep túıdi Asqar Mamın.