Premer-Mınıstr revaktsınatsııalaý jumystaryn jandandyrýdy tapsyrdy

NUR-SULTAN. QazAqparat – Koronavırýspen kúres boıynsha barlyq máseleni Vedomstvoaralyq komıssııa otyrystarynda jedel qaraý kerek. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Jalpy koronavırýs ınfektsııasyn juqtyrýdyń kóbeıgenin, ásirese, elorda jáne Qaraǵandy oblysynda óskenin kórip otyrmyz. Kún saıyn respýblıka boıynsha 3 myńǵa deıin jaǵdaı tirkeledi. Bul – joǵary kórsetkish. Sondyqtan Koronavırýstyń taralýyna jol bermeý jónindegi vedomstvoaralyq komıssııa shekteý sharalaryn kúsheıtti, olar óńirlermen jáne «Atameken» palatasymen aldyn ala kelisildi», - dedi Á. Smaıylov.

Osy oraıda Úkimet basshysy Densaýlyq saqtaý mınıstrligi epıdemıologııalyq jaǵdaıǵa turaqty monıtorıng júrgizýi qajet ekenin tapsyrdy.

«Shekteý sharalarynyń saqtalýyn qamtamasyz etý kerek. Maska taǵý, áleýmettik qashyqtyqty saqtaý sııaqty aldyn alýdyń negizgi sharalary qatań saqtalýy mańyzdy. Vaktsınatsııalaý men revaktsınatsııalaýdyń tómen qarqyny epıdemıologııalyq jaǵdaıdyń kúrt nasharlap ketýine alyp keledi. Ákimdikterge halyqty vaktsınatsııalaý jáne revaktsınatsııalaý jumystaryn jandandyrýdy tapsyramyn. Barlyq problemalyq máselelerdi Vedomstvoaralyq komıssııa otyrystarynda jedel qarap, tıisti sharalar qabyldaý qajet», - dedi Álıhan Smaılov,

Budan buryn habarlanǵandaı, Úkimet otyrysynda qyrkúıek aıynda koronavırýstyń taralýy tómendeýi múmkin ekeni aıtyldy.

Foto: t.me/KZgovernment