Premer-Mınıstr Ózenmunaıgazdaǵy eńbek daýlaryn tekserýdiń aralyq qorytyndysyn málim etti

ASTANA. QazAqparat – Premer-Mınıstr Álıhan Smaıylov Májilis depýtattarynyń Mańǵystaý oblysyndaǵy eńbek daýlaryn Úkimet deńgeıinde sheshý týraly saýalyna bergen jaýabynda «Ózenmunaıgazdaǵy» tekserýdiń aralyq qorytyndysyn málim etti, dep habarlaıdy QazAqparat tilshisi.

«Búgingi tańda eńbek ujymdaryndaǵy jaǵdaı turaqty, kompanııalar shtattyq rejımde jumys istep jatyr. Tenderlik rásimderdi ótkizýdiń ashyqtyǵy, sybaılas jemqorlyq táýekelderiniń bolýy, munaı servıstik kompanııalardyń qyzmetin tekserý, eńbek zańnamasyn saqtaý, jumysqa ornalastyrý máselelerin qamtıtyn taldaý júrgizý maqsatymen quramyna Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Ekologııa jáne tabıǵı resýrstar mınıstrlikteriniń, «QazMunaıGaz» UK AQ ókilderi kiretin jumys toby quryldy», - delingen jaýapta.

Jaýapta berilgen anyqtama deregi boıynsha jumys tobynyń quramyna kirgenderdiń jalpy sany 120 adam bolǵan.

«Tekserý barysynda QMG kompanııalar tobynyń munaı servıstik kásiporyndary jáne «Ózenmunaıgaz» AQ-men (budan ári – ÓMG) sharttyq qatynastary bar ózge merdiger uıymdar qamtyldy. Jumys toby munaı servısi kásiporyndarynyń eńbek ujymdarymen kezdesýler uıymdastyrdy, jumyskerlerdiń usynystary tirkeldi, eńbek jaǵdaılary, tsehtardyń, jabdyqtar men tehnıkanyń jaı-kúıi jáne t.b. zertteldi. Búgingi tańda kezdesýlerdiń nátıjeleri boıynsha 2995 joldanym taldandy», - dep jazady Úkimet basshysy.

Atalǵan joldanymdardy mynandaı 9 sanatqa bólipti: óndiris; satyp alý/jabdyqtaý; HR adamı resýrstar; eńbekti qorǵaý; qorshaǵan ortany qorǵaý; qarjylyq, áleýmettik máseleler, (IR) merdiger uıymdarmen ózara is-qımyl jáne basqalar.

«Sonymen qatar Bas prokýratýra 23 sáýirde «Samuryq – Qazyna» UÁQ» AQ QMG-nyń jáne olardyń enshiles kásiporyndarynyń taýarlaryn, jumystary men kórsetiletin qyzmetterin satyp alýdy keshendi taldaý boıynsha arnaıy top qurdy.

Búgingi tańda Bas prokýratýra men jumys toby atalǵan is-sharalar boıynsha jumystardy jalǵastyrýda. Budan basqa, áleýmettik-ekonomıkalyq problemalardy sheshý, eńbek janjaldaryn sheshý jáne olarǵa jol bermeý tetikteri boıynsha taldaý júrgizý jáne usynystar ázirleý, eldiń barlyq óńirlerinde sapaly jáne ataýly túsindirý-profılaktıkalyq jumysty qamtamasyz etý maqsatynda Premer-Mınıstrdiń ókimimen arnaıy jumys toby bekitildi. Arnaıy jumys tobynyń quramyna depýtattar, ýákiletti ortalyq memlekettik jáne jergilikti atqarýshy organdardyń, Qordyń, QMG men kásipodaqtar qaýymdastyǵynyń ókilderi kirdi», - dep jazylǵan jaýapta.