Premer-Mınıstr nashaqorlardy emdeý ádistemesin jańartýdy tapsyrdy

ASTANA. QazAqparat – Premer-Mınıstr Álıhan Smaıylov nashaqorlardy emdeý jáne áleýmettendirý ádistemesin jańartýdy tapsyrdy, dep habarlaıdy QazAqparat tilshisi.

«Nashaqorlardy emdeý, ońaltý jáne áleýmettik ortaǵa beıimdeý ádistemelerin jetildirý qajet. Osy baǵyttaǵy halyqaralyq tájirıbeni eskere otyryp, qoldanystaǵy emdeý ádisteriniń tıimdiligine taldaý júrgizip, jańa tásilderdi ázirleý kerek.

Nashaqorlyqtan aıyqqan adamdarǵa qoǵamnyń durys kózqarasyn qalyptastyrǵan jón. Bul jerde emdelýge yntalandyrý ǵana emes, ondaı adamdardy odan ári áleýmettendirý qajet. Sondyqtan densaýlyq saqtaý jáne Eńbek mınıstrlikteri osy baǵyttaǵy kúsh-jigerin biriktirip, tıisti sharalardy usynsyn», - dedi ol Úkimet otyrysynda.

Al Ádilet mınıstrligine sot-saraptama organdaryn zamanaýı quraldarmen qamtamasyz etý júkteldi.

«Sot-saraptama organdarynyń materıaldyq tehnıka men jabdyqtary, esirtki zertteý ádistemesi zaman talabynan artta qalyp otyr. Ádilet mınıstrligine sot-saraptama organdaryn materıaldyq-tehnıkalyq qamtamasyz etý jóninde tıisti sharalardy turaqty túrde qabyldaý qajet», - dedi Álıhan Smaıylov.