Premer-Mınıstr Mınskide ótetin Eýrazııalyq úkimetaralyq keńes otyrysyna qatysady

NUR-SULTAN. QazAqparat – Premer-Mınıstr Álıhan Smaıylov bastaǵan Qazaqstan Respýblıkasy Úkimetiniń delegatsııasy Eýrazııalyq úkimetaralyq keńestiń kezekti otyrysyna qatysý úshin Mınsk qalasyna bardy, dep habarlaıdy QazAqparat Úkimettiń resmı saıtyna silteme jasap.

Sharaǵa Armenııanyń Úkimet basshysy Nıkol Pashınıan, Belarýs Úkimetiniń basshysy Roman Golovchenko, Qyrǵyzstannyń Úkimet basshysy Akylbek Japarov, Reseıdiń Úkimet basshysy Mıhaıl Mıshýstın, Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch jáne basqalary qatysady.

Shaǵyn jáne keńeıtilgen quramda ótetin keńes otyrystarynda Eýrazııalyq ekonomıkalyq odaqtyń biriktirilgen aqparattyq júıesin damytý, taýarlardy tańbalaýdy júrgizý, alkogol naryǵyn retteý jáne elektrondyq saýda kezinde salyq salý máselelerin talqylaý josparlanyp otyr.

Sondaı-aq, «Shyǵys-Batys» jáne «Soltústik-Ońtústik» baǵyttarynda, onyń ishinde Qytaıdyń «Bir beldeý, bir jol» bastamasy aıasynda EAEO-nyń kólik ınfraqurylymyn damytý, ónerkásiptiń joǵary tehnologııalyq salalaryndaǵy kooperatsııa, tutynýshylardyń quqyqtaryn qorǵaý salasyndaǵy birlesken is-qımyl baǵdarlamasy, transshekaralyq naryqtardaǵy básekelestiktiń jaı-kúıi jáne basqa da birqatar másele talqylanady.

Otyrys qorytyndysy boıynsha qabyldanǵan sheshimderdi bekitetin kóp jaqty qujattarǵa qol qoıylmaq.