Premer-Mınıstr qurylys materıaldarynyń qunyn arzandatýǵa qatysty tapsyrma berdi
«Indýstrııa mınıstrligi «Samuryq-Qazyna» qorymen, «Báıterek» holdıngimen, «Atameken» kásipkerler palatasy jáne ákimdermen birlesip bir aı ishinde Qurylys ındýstrııasy jobalaryn iske asyrý boıynsha 2025 jylǵa deıingi jol kartasyn ázirlesin», - dep tapsyrdy A. Mamın.
Sonymen qatar Indýstrııa mınıstrligine «Báıterek» holdıngimen birlesip, naryqta deldaldardyń jumysyna jol bermeý jáne qurylys materıaldarynyń qunyn arzandatý úshin 2022 jylǵy 1 naýryzǵa deıin «Marketpleıs» onlaın alańyn paıdalanýǵa engizý júkteldi.
«Indýstrııa mınıstrligi Básekelestikti qorǵaý agenttigimen jáne ákimdiktermen birlesip, qurylys materıaldary baǵasyn negizsiz ósirý faktileri boıynsha ýaqtyly sharalar qabyldap, únemi baqylaýdy qamtamasyz etsin», - dedi Úkimet basshysy.
Budan buryn habarlanǵandaı, qurylystyń jalpy ishki ónim qurylymyndaǵy úlesi 2020 jylǵy 12 aıdyń qorytyndysy boıynsha 6,1 paıyzdan bıylǵy 11 aıdyń qorytyndysy boıynsha 6,25 paıyzǵa ósti.
Naryqty qoljetimdi otandyq qurylys materıaldarymen qamtamasyz etý úshin 2025 jylǵa qaraı quny 1 trln teńgeden asatyn qurylys ındýstrııasynyń 165 jańa jobasy iske asyrylady.