Premer-Mınıstr Qostanaı oblysynyń jańa ákimine qandaı tapsyrmalar berdi

QOSTANAI. QazAqparat - Búgin Qostanaı oblysynyń ákimi bolyp taǵaıyndalǵan Qumar Aqsaqalovty oblys aktıvine tanystyrǵan Premer-Mınıstr Álıhan Smaıylov ákimdiktiń aldyna birqatar mindet qoıylǵanyn aıtty. Bul týraly QazAqparat Úkimettiń saıtyna silteme jasap habarlaıdy.

Onyń ishinde, Memleket basshysynyń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasy aıasynda halyqtyń ómir súrý deńgeıi men ál-aýqatyn arttyrý sharalary qarastyrylǵan. Aldaǵy jyldary oblysta 7,5 myń oqýshyǵa arnalǵan 9 jańa mektep, 25 alǵashqy medıtsınalyq-sanıtarlyq kómek nysanyn salý jáne 2 aýdandyq aýrýhanany jańǵyrtý josparlanyp otyr. Budan basqa, agroónerkásiptik keshendi jáne aýyldaǵy kásipkerlikti damytý jónindegi is-sharalar kózdelgen.

«Qostanaı oblysy úshin mashına jasaý salasynyń mańyzy óte zor. Salanyń óńir men jalpy el úshin mańyzdylyǵyn eskere otyryp, lokalızatsııa deńgeıin odan ári arttyrý, quramdas bólikteri óndirisin damytý, sondaı-aq joǵary bilikti kadrlardy daıarlaý búgingi tańda ózekti máseleler bolyp tabylady», — dedi ol.

Sonymen qatar Premer-Mınıstr áleýmettik obektilerdi, turǵyn úı-kommýnaldyq jáne energetıkalyq ınfraqurylymdy jańǵyrtý, jańa ındýstrııalyq jobalardy iske qosý, jumys oryndaryn qurý jáne jergilikti joldardyń sapasyn arttyrý jónindegi sharalardy iske asyrý jumystaryn kúsheıtý qajettigine nazar aýdardy.

«Oblys basshylyǵy jylý berý maýsymynyń turaqty ótýi jáne JEO men jylý trassalarynda apattyq jaǵdaılardyń aldyn alý boıynsha barlyq qajetti sharalardy qabyldaýy qajet», — dep túıindedi Álıhan Smaıylov.