Premer-Mınıstr keńeıtilgen Úkimet otyrysynda Prezıdent bergen tapsyrmalardy oryndaý máseleleri boıynsha kezekti keńes ótkizdi
Keńeste ortalyq atqarýshy organdardyń, ulttyq kompanııalardyń basshylary sóz sóıledi.
Keńes barysynda el Prezıdenti tapsyrmalaryn júzege asyrýǵa baılanysty qarjy-ekonomıkalyq máseleler blogy qarastyryldy.
Atap aıtqanda, óńirlik damý, memlekettik satyp alýdy jetildirý, memlekettik jáne salalyq baǵdarlamalardy qarjylandyrý jáne ońtaılandyrý jáne t.b. máseleleri boıynsha ÓDM jáne EBJM arasyndaǵy ókilettikti jikteý máseleleri talqylandy.
EBJM basshysy E.Dosaev «memlekettik jáne salalyq baǵdarlamalardy keshendi baǵalaý, daıyndaý sapasyn taldaý júrgizildi jáne olardy ońtaılandyrý jáne júzege asyrý quraldaryn sapaly túrde jaqsartý usynystary jasalyndy», - dep atap ótti.
Premer-Mınıstr ortalyq atqarýshy organdar basshylarynyń nazaryn tıimdi jumys atqaratyn baǵdarlamalardy anyqtaý qajettiligine aýdardy.
«Jumys istemeıtin baǵdarlamalarǵa jarmasa bermeńizder. Jumys istemeıtin baǵdarlamalardy qysqartyp, qarjyny daǵdarysqa qarsy sharalar aıasyndaǵy ekonomıkanyń basym baǵyttaryna, ıaǵnı, jańa jumys oryndaryn ashýǵa jáne ekonomıkany kóterýge baǵyttaımyz», - dep atap ótti S.Ahmetov.
S.Ahmetov kásiporyndar jáne jekeshelendirýdiń ekinshi tolqyny aıasyndaǵy nysandar sanyn kóbeıtý máselelerin talqylaý barysynda birneshe tapsyrma berdi. Premer-Mınıstr memlekettik múlik boıynsha jergilikti organdar áreketsizdigine kóńili tolmady.
«Bizde jekeshelendirý, memlekettik menshikti basqarý jumystary boıynsha kóptegen komıtetter bar. Olardyń nemen aınalysatyny túsiniksiz. Memlekettik múlik máselelerimen aınalysatyn eki-ekiden jergilikti memlekettik organdar bar. Biraq, jumys jasalynbaı jatyr. Muny qolǵa alý kerek», - dep tapsyrdy S.Ahmetov.
Premer-Mınıstr keńes qatysýshylaryna Memleket basshysy tapsyrmalaryn oryndaý barysyn muqııat baqylaý jóninde nusqaý berdi.
«Tapsyrmalardy júzege asyrý mınıstrlerdiń jiti baqylaýynda bolý kerek. Olardy naqty jáne sapaly túrde oryndaý óz nátıjesin beredi. Prezıdent tapsyrmalaryn júzege asyrý barysyn muqııat baqylaýdy tapsyramyn»,- dedi S.Ahmetov.
Premer-Mınıstr, sondaı-aq Prezıdenttiń Jambyl oblysyna jumys sapary qorytyndysy boıynsha tapsyrmalaryna toqtalyp ótti.
«Memleket basshysy oblystaǵy baǵdarlamalardy júzege asyrýdy synǵa aldy. Baǵdarlama aıasynda 38 kásiporyn ashyldy, onyń 29 ǵana jumys isteıdi. Bári aıtyp júrgen iri tsement zaýyty ashyldy da, birden jabylyp qaldy. Tekserińder», - dep S.Ahmetov ókiletti organdarǵa tapsyrdy.
Keńeste avtojol qaýipsizdigin qamtamasyz etý jáne olardy sáıkesinshe tehnologııalyq elementtermen jabdyqtaý máseleleri kóterildi.
«Ústimizdegi jyldyń basynan Jambyl oblysy joldarynda, onyń ishinde «Batys Eýropa - Batys Qytaı» aýmaǵynda 300-den astam adam qaza tapty, 1000-nan astam apat oryn aldy. Joldar bóletin elementtermen jabdyqtalmaǵan», - dedi Premer-Mınıstr.
«Birinshi kategorııaǵa jatatyn joldardyń qurylysy kezinde sáıkes jabdyqtardy ornatýdy eskerý kerek: jyldamdyq ólsheýishter, kameralar, jol belgileri. Tórt jolaqty joldardyń qurylysynda bólgishterdiń bolmaýy túsiniksiz. Astana-Býrabaı trassasyn qarastyraıyq. Jańa trassanyń qurylysyna deıin jylyna 80 adam qaza tabatyn. Al 2012 jylǵy kórsetkishter boıynsha bir adam qaza tapqan», - dep atap ótti S.Ahmetov.
Premer-Mınıstr atalǵan máseleni qarap, olardy sheshýdi tapsyrdy.