Premer-Mınıstr: Qazaqstandyq qutqarýshylar Túrkııada kásibıliktiń joǵary deńgeıin kórsetti

ASTANA. QazAqparat – QR Premer-Mınıstri Álıhan Smaıylov Túrkııada zilzala qurbandaryn qutqarýǵa atsalysqan QR TJM qyzmetkerlerine alǵys aıtty, dep habarlaıdy QazAqparat tilshisi.

«Eń aldymen, baýyrlas Túrkııa Respýblıkasyna baryp, jer silkinisinen zardap shekken adamdardy qutqarýǵa atsalysqan Tótenshe jaǵdaılar mınıstrliginiń qyzmetkerlerine shynaıy alǵysymyzdy bildiremiz. Bizdiń mamandarymyz kásibıliktiń joǵary deńgeıin kórsetti, bastaryn qaterge tigip, mártebeli mindetti abyroımen oryndady», - dedi Á. Smaıylov Úkimettiń búgingi otyrysynda.

Sonymen birge mınıstr óz elimizdegi sý tasqyny qaýpine daıyndyqty kúsheıtýdi tapsyrdy.

«Mınıstrliktiń elimizdiń ońtústik óńirlerindegi bólimsheleri de shuǵyl áreket etip, bıylǵy aqpan aıynda bolǵan tasqyn qaýpin barynsha azaıtty. Olardyń da úılesimdi jumysyn atap ótkim keledi. Degenmen, qalyptasyp otyrǵan jaǵdaıdy eskere otyryp, biz sý tasqyny kezeńine daıyndyq máselelerin taǵy bir ret qaraýymyz qajet», - dedi Úkimet basshysy.