Premer-Mınıstr ishki kómir naryǵyn tekserýdi tapsyrdy

ASTANA. QazAqparat – Óńirlik kommýnaldyq qyzmetter men jylý ortalyqtarynyń is-qımylynyń ár qadamy jazylǵan algorıtm bekitilýi tıis.

Bul týraly Úkimet otyrysynda aldaǵy jylý berý maýsymyna daıyndyq máselesin talqylaý kezinde Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Jalpy, jylytý maýsymyna daıyndyq jáne ony ótkizý barysy – kúndelikti mańyzdy másele. Sondyqtan, árbir óńirde jol kartasyn ázirlep, bekitý qajet. Onda jylý jelilerin damytýdy, jańa Jylý ortalyqtaryn salý men qoldanystaǵy ortalyqtardy kúrdeli jóndeý jumystaryn naqty aıqyndaý kerek. Sondaı-aq, avarııalar bolǵan jaǵdaıda óńirlik kommýnaldyq qyzmetter men jylý ortalyqtarynyń is-qımylynyń ár qadamy jazylǵan algorıtm bekitilýi tıis», - dedi Á. Smaıylov Úkimet otyrysynda.

Onyń aıtýynsha, osy sektordaǵy tsıfrlandyrý men avtomattandyrý deńgeıin arttyrý mańyzdy.

«Jylý jelisi ınfraqurylymynyń jaı-kúıi, shyǵyn deńgeıi, tutynatyn jylý energııasynyń qýaty men sapasy týraly obektıvti derekter qajet. Bul jylý júıesin basqarýǵa jáne jylý beretin obektilerdegi avarııalar sanyn azaıtýǵa múmkindik beredi», - dedi Premer-Mınıstr.

Úkimet basshysy óńir ákimdikteri belgilengen merzimde barlyq josparlanǵan jóndeý jumystarynyń aıaqtalýyn jáne qajet kólemde otynnyń aldyn ala jetkizilýin qamtamasyz etýi qajet ekenin tapsyrdy.

«Іshki kómir naryǵynda dúrbeleńge jol bermeý úshin óńir ákimdikteri tıisti tártippen 2 apta merzimde kómirdi daıyndaý jáne ótkizý pýnktteriniń jaǵdaıyna, onyń sapasyna, jetkizý kestelerine, baǵa deńgeıine tekserý júrgizýi qajet. Indýstrııa mınıstrligi «Qazaqstan Temir Jolymen» birlesip, kómir jetkizý úshin vagondardyń qajetti sanyn qamtamasyz etýi tıis. Óńirlerde jetkizilgen otyn úshin kásiporyndardyń, sondaı-aq kommýnaldyq qyzmetter úshin tutynýshylardyń debıtorlyq bereshegin óteý jumystaryn kúsheıtý kerek», - dedi Premer-Mınıstr.