Premer-Mınıstr Imantaý-Shalqar kýrorttyq aımaǵyn damytýdy tapsyrdy
«Keıbir demalatyn jerlerge áýe jáne temirjol tasymalynyń bolmaýy, demalys maýsymynda jol qatynasynyń qıyndyǵy – týrızmniń damýyn tejep otyrǵan máselelerdiń biri. Osyǵan baılanysty, Indýstrııa mınıstrligi ıntermodaldyq jolaýshylar tasymalyn damytý boıynsha usynystar ázirlep, avıa, avto jáne temirjol kólikteriniń yńǵaıly baǵyttaryn qamtamasyz etýi qajet», - dep atap ótti Á. Smaıylov Úkimettiń búgingi otyrysynda.
Sonymen birge, týrıstik sala mamandaryn kásibı daıarlaýǵa júıeli tásil kerek ekenin basa aıtty.
«Qoldanystaǵy baǵdarlamalar týrızm salasynyń naqty qajettilikterine saı kelmeıdi. Sondyqtan osy baǵyttaǵy jumysty, onyń ishinde Túrkistan qalasyndaǵy Halyqaralyq týrızm jáne meımandostyq ýnıversıtetiniń bazasynda kúsheıtý qajet.
Jalpy týrızm salasynyń damýynda oń dınamıka bar, osy oraıda keı máselelerge kóńil bólý kerek. Óńir ákimdikteri múddeli memlekettik organdarmen birlesip, týrıstik obektilerdi ınjenerlik ınfraqurylymmen ýaqytyly qamtamasyz etsin», - dedi Á. Smaıylov.
Odan bólek, Mádenıet mınıstrligine óńir ákimdikterimen birlesip, birinshi kezekte týrısterdiń qaýipsizdigi men qyzmet sapasyn arttyrýdy kózdeıtin týrıstik ónimder usyný tapsyryldy.
«Eń bastysy, týrısterge qyzmet kórsetý sapasyna nazar aýdarý kerek jáne bıotýaletter máselesi sheshilýi tıis. Bul týrıster sanynyń ósýine yqpal etedi. Otandyq jáne sheteldik týrıster kóbine dál osy servıstiń nasharlyǵyn aıtyp, shaǵymdanady. Sondyqtan, bul máseleni muqııat pysyqtaý qajet. Úshinshiden, Mádenıet mınıstrligi Ekologııa mınıstrligimen jáne Soltústik Qazaqstan oblysynyń ákimdigimen birge Imantaý-Shalqar kýrorttyq aımaǵyn damytý josparyn bekitip, ondaǵy sharalardy iske asyrýǵa kirissin. Ózderińiz biletindeı, bul týraly Memleket basshysynyń tıisti tapsyrmasy bar. Ol naqty oryndalýy tıis», - dedi Á. Smaıylov.
Buǵan deıin Úkimet basshysy ekotýrızm ınfraqurylymyn damytýdyń mańyzy zor ekenin aıtqan edi.