Premer-Mınıstr «ExxonMobil»-men Teńiz jáne Qashaǵandaǵy birlesken jobalardy talqylady

NUR-SULTAN. QazAqparat - QR Premer-Mınıstri Asqar Mamın Qazaqstandaǵy «ExxonMobil» basqarýshy dırektory Dınesh Sıvasambýmen kezdesti, dep habarlaıdy QazAqparat primeminister.kz saıtyna silteme jasap.

Kezdesý barysynda munaı-gaz salasynda, sonyń ishinde Teńiz jáne Qashaǵan ken oryndaryn ıgerý jónindegi birlesken jobalardy iske asyrý aıasyndaǵy yntymaqtastyqtyń perspektıvalyq baǵyttary men ózekti máseleleri talqylandy.

QR Energetıka mınıstrliginiń derekteri boıynsha, bıyl Qashaǵanda 12,9 mıllıonǵa jýyq tonna munaı jáne 8 mlrd tekshe metr gaz óndirý kózdelgen. Rekonstrýktsııa jumystarynan keıin ken ornynda táýligine 70 myń barrel deńgeıinen bastap óndirý qaıta jańartyldy. Kólemdi birtindep arttyrýdy eskere otyryp, taıaý perspektıvada kúndelikti kólem 370-400 myń barrel munaıǵa jetedi.

Sondaı-aq, Teńiz ken ornynyń nysandarynda kúrdeli jóndeý jumystaryn júrgizý josparlanǵan. Buǵan qosa, Hazar ken ornymen birge Qalamqas teńiz ken ornyn ıgerý máselesi pysyqtalýda.

Kezdesý barysynda «ExxonMobil»-dyń Qazaqstannyń mańyzdy seriktesi ekeni atalyp ótti, kompanııamen tyǵyz yntymaqtastyq elimizdiń munaı salasyn damytýǵa yqpal etedi.