Premer-Mınıstr: Energııa tapshylyǵyn kórshi elderdiń kómegimen sheship otyrmyz

ASTANA. QazAqparat – QR Premer-Mınıstri Álıhan Smaıylov birneshe mınıstrlik pen «Samuryq-Qazyna» qoryna qazan aıynyń sońyna deıin «ınvestıtsııa ornyna tarıf» saıasatyn iske asyrýdyń naqty mehanızmin usynýdy tapsyrdy, dep habarlaıdy QazAqparat tilshisi.

«Birinshi. Qazirgi kezde elektr qýatynyń tapshylyǵy kórshi elderdiń energııa júıesi arqyly sheshilip keledi.

Energetıka mınıstrligi «Samuryq-Qazyna» qorymen birlesip, jyl sońyna deıin energııany turaqty túrde jetkizýdi qamtamasyz etýi qajet.

Ekinshi. Energetıka mınıstrligi salaǵa eń kóp salmaq túsetin maýsymdyq kezeńderde qajetti manevrlik qýattardy ulǵaıtý sharalaryn qabyldasyn.

Úshinshi. Ulttyq ekonomıka, Energetıka, Indýstrııa mınıstrlikteri men «Samuryq-Qazyna» qory qazan aıynyń sońyna deıin «ınvestıtsııa ornyna tarıf» saıasatyn iske asyrýdyń naqty mehanızmin usynsyn», - dedi Álıhan Smaıylov.

Sondaı-aq, ol energetıka mınıstrligi elektr jáne jylý energııasyna «ádil tarıfterdi» kezeń-kezeńimen belgileý sharalaryn qabyldaýdy júktedi.

«Álemdik tájirıbeni eskere otyryp, kómir jaǵatyn elektr stantsııalarynan zııandy zattardy azaıtý jáne olardy kádege jaratý tehnologııalaryn ázirlep, qoldanysqa engizý qajet», -dedi Úkimet basshysy.