Premer-Mınıstr energetıka salasyndaǵy jobalar týraly aıtty

ASTANA. QazAqparat – Qazaqstanda elektr jáne jylýmen qamtý boıynsha jańa jobalar júzege asyrylady. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy QazAqparat tilshisi.

«Bıyl Atyraý, Qaraǵandy jáne Pavlodar oblystaryndaǵy qýaty 700 MVt-tan asatyn elektr stansalaryn jańǵyrtý jumystary aıaqtalyp, Ekibastuz GRES-1-degi qýaty 500 MVt №1 energoblok qalpyna keltiriledi. Tarıfti ınvestıtsııaǵa aıyrbastaý» baǵdarlamasy aıasynda Ekibastuz GRES-2-degi 3-shi jáne 4-shi bloktardy iske qosý josparlanǵan. Sondaı-aq Balqash JES salý máselesi boıynsha jumystar pysyqtalyp jatyr», — dedi Premer-Mınıstr.

Budan bólek, ol ońtústik óńirlerde aıaqtalýy 2025-2026 jyldarǵa josparlanǵan gaz óndirý boıynsha qýaty 2,3 GVt-tan asatyn energetıkalyq jobalardyń júzege asyrylyp jatqanyn, sondaı-aq Almaty jáne Túrkistan qalalaryndaǵy 2-JEO-yna bý-gaz qondyrǵylaryn engizý kózdelip otyrǵanyn aıtty.

«Bıyl Qyzylordada jańa JEO qurylysy bastaldy. Kókshetaý men Semeı qalalaryndaǵy jylý elektr stansalary qurylysyn júrgizetin merdigerlerdi anyqtaý úshin konkýrs jarııalandy», — dedi Álıhan Smaıylov.

Sonymen qatar, Total Energies (Frantsııa), Acwa Power (Saýd Arabııasy) jáne Masdar (BAÁ) kompanııalarymen birlesip, jalpy qýaty 3 GVt jańartylatyn energııa kózderi boıynsha jobalardy júzege asyrý bastaldy.

Úkimet basshysy AES jáne shaǵyn modýldik reaktorlar qurylysy máselesi pysyqtalyp jatqanyn aıtty.

«Eldegi barlyq jylý elektr stansalaryna aýdıt aıaqtaldy. Bıyl qajet jóndeý jumystary júrgiziledi», — dep túıindedi Álıhan Smaıylov.