Premer-Mınıstr elektrondy bilim berý máselelerin talqylady

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Tsıfrlandyrý baǵdarlamasyn iske asyrý aıasynda elektrondy bilim berýdi damytý máseleleri jóninde keńes ótkizdi, dep habarlaıdy primeminister.kz. 

Keńes barysynda oqytý protsesiniń barlyq kezeńinde, elimizdiń mektepke deıingi mekemelerinen bastap joǵary oqý oryndaryna deıin elektrondy bilim berý júıesin engizý máselesi talqylandy.

Qazirgi tańda 13 qalada jáne bir oblysta elektrondy aınalym arqyly balabaqshalarǵa kezekke qoıý jáne baǵyt berý júıesi engizilip jatyr. Orta bilim berýde memlekettik-jekeshelik áriptestik aıasynda elektrondyq jýrnaldar men kúndelikter júıesi jumys isteı bastady. Kásiptik jáne joǵary bilim berýde kóp deńgeıli aqparattyq «Joǵary bilim berýdi basqarýdyń biryńǵaı júıesi» engizilýde. Ulttyq bilim berý derekqoryn memlekettik organdardyń aqparattyq júıelerimen biriktirýdi 01.09.2018 deıin júzege asyrý kózdelgen.

Júıeni tsıfrlandyrý jeke sáıkestendirý nómiri boıynsha balanyń biryńǵaı elektrondy derekter bazasyn qurýǵa múmkindik beredi. Keleshekte bilim deńgeıine (balabaqshalar, mektepter, kolledjder, JOO-lar) qatysty protsester bilim berýdiń ár kezeńinde qosymsha qujattar men anyqtamalardy jınaý qajettiginsiz, elektrondy túrde júzege asyrylatyn bolady.

 Anyqtama: Búginde jalpy respýblıkadaǵy 7047 jalpy bilim berý mektepteriniń ishinde 4355-ten astamy (62%) joǵary jyldamdyqty Internetke qosylǵan. Kolledjderdiń jabdyqtalý deńgeıi - 90%, JOO-lar - 100%.