Premer-Mınıstr eki aptada sý tasqynynan qorǵaý jónindegi sharalar josparyn daıyndaýdy tapsyrdy
Biz sý tasqyny kezeńine daıyndyq máselesin ádeıi erte qarap otyrmyz. Kóktemge deıin áli biraz ýaqyt bar. Degenmen, barlyq daıyndyq sharalaryn qys túskenshe aıaqtaý qajet. Sý tasqyny qatelikterdi keshirmeıdi. Oryndalmaı qalǵan jumystar men bólinbeı qalǵan qarajattyń sońy tótenshe jaǵdaılarǵa ákep soqtyrýy múmkin», - dedi Á. Smaıylov Úkimettiń búgingi otyrysynda.
Premer-Mınıstr bıylǵy kóktemniń ońaı bolmaǵanyn, ońtústik jáne batys óńirlerde sý burý kanaldary men aryqtardyń, eldi mekender mańaıynda tasqynnan qorǵaıtyn topyraq úıindileriniń bolmaǵanyn eske saldy.
«Túrkistan, Jambyl jáne Almaty oblystarynda drenajdyq júıeler qatty jaýyn-shashynǵa tótep bere almady. Aqtóbe, Batys Qazaqstan oblystarynda burynnan bar bógetter men topyraq úıindilerin sý shaıyp ketti. Sonyń saldarynan turǵyn úılerge sý jaıylyp, qırap qaldy. Al Qostanaı oblysynyń Shıli aýylynda 2020 jyly ǵana kúrdeli jóndeý júrgizilgen bóget qırap qalǵan. Keı jerlerde qardy ýaqytyly shyǵaryp, aryqtardy tazartyp turýǵa jete mán berilgen joq», - dedi Úkimet basshysy.
Á. Smaıylov Tótenshe jaǵdaılar mınıstrligine eki apta ishinde halyqty sý tasqynynan qorǵaý jónindegi is-sharalar josparyn daıyndaýdy tapsyrdy.
«Budan basqa, qazirgi Jol kartasyn iske asyrýdy aıaqtaý qorytyndysy boıynsha onyń oryndalýyna taldaý júrgizip, Úkimet apparatyna esep berýi qajet. Óńir ákimderi sý tasqynyna daıyndyq sharalaryn aldyn ala jáne sapaly ótkizýdi qamtamasyz etýi qajet. Halyq sý tasqynynan qorǵaý sharalarynyń oryndalmaǵany týraly únemi shaǵymdanady. Kúz sońyna deıin eldi mekenderdi úıindimen qorshaý, qubyrlar men aryqtardy tazartý, gıdrotehnıkalyq qurylystardyń jaı-kúıin tekserý jáne sý burý arnalaryn daıyndaý jumystaryn aıaqtaý qajet», - dep tapsyrma berdi Á. Smaıylov.