Premer-Mınıstr: Bıýdjet qarajatyn óz maqsatyna paıdalaný qajet
«Baıandamalardan baıqap otyrmyz, qabyldanyp jatqan sharalardyń arqasynda segiz aıdyń qorytyndysy boıynsha ekonomıkanyń negizgi salalarynda ósýdiń oń serpini saqtalyp otyr. Óńdeý ónerkásibinde ósim 3,3 paıyzǵa, onyń ishinde mashına jasaýda – 16,3, tamaq ónimderiniń óndirisinde – 3,6, farmatsevtıkada – 34,1 paıyzǵa, jeńil ónerkásipte – 11, hımııa ónerkásibinde – 3,1 jáne daıyn metall buıymdarynyń óndirisinde 18,8 paıyzǵa ósim qamtamasyz etildi. Qurylys kólemi 6,5 paıyzǵa artty, turǵyn úılerdiń 6,4 paıyzy nemese shamamen 8,1 mln sharshy metr paıdalanýǵa berildi. Aýyl sharýashylyǵynda turaqty ósim 4,9 paıyz deńgeıinde qamtamasyz etildi», - dep atap ótti Premer-Mınıstr Úkimet otyrysynda.
OPEK+jasalǵan kelisimderdi oryndaý qajettiligi jaǵdaıynda munaı óndirýdiń de tómendeýi baıqalady. Sonymen qatar, taý-ken sektorynyń basqa mańyzdy baǵyttary boıynsha oń serpin saqtalyp otyr, onyń ishinde kómir óndirý – 1,2, metall rýdalary – 1,3 paıyzǵa ósti.
«Ózderińizge málim, qatań karantındik shekteý sharalary tek 17 tamyzda ǵana alyndy. Osyǵan baılanysty, qyzmet kórsetý sektorynda, sonyń ishinde kólik pen saýda salasynda kórsetkishterdiń tómendegeni baıqalady. Jalpy 8 aıda 5 negizgi kórsetkishter boıynsha segiz óńir áleýmettik-ekonomıkalyq damýdyń ósýin qamtamasyz etti. Olar – Aqmola, Almaty, Shyǵys Qazaqstan, Jambyl, Qostanaı, Mańǵystaý jáne Soltústik Qazaqstan, Pavlodar oblystary. Alty óńirde 4 kórsetkish boıynsha oń serpin baıqaldy. Olar – Aqtóbe, Qaraǵandy, Túrkistan oblystary jáne Nur-Sultan, Almaty, Shymkent qalalary.
Jalpy, óńirler Memleket basshysynyń Qazaqstan halqyna Joldaýynda qoıylǵan barlyq mindetterdi tıimdi iske asyrý úshin jumysty jandandyrýy kerek. Qazirgi jaǵdaıda ortalyq jáne jergilikti organdardyń birinshi basshylary bıýdjet qarajatyn tıimdi ıgerilýin qamtamasyz etý kerek. Qarajatty ýaqytyly jáne óz maqsatyna paıdalaný jóninde shuǵyl sharalar qabyldaýdy tapsyramyn», - dedi Asqar Mamın.