Premer-Mınıstr «Bilimdi ult» ulttyq jobasyn qaıta qaraýdy tapsyrdy
Álıhan Smaıylov vedomstvonyń aldaǵy jobalary men usynystaryn qoldaıtynyn aıta kelip, birneshe tapsyrma berdi.
«Birinshi, Prezıdent tapsyrmalaryna sáıkes, «Bilimdi ult» sapaly bilim berý ulttyq jobasyn tez arada qaıta qaraý kerek.
Ekinshi, Ulttyq ekonomıka, Qarjy mınıstrlikterimen birlesip Úkimettiń 2022 jylǵa arnalǵan is-qımyl josparynyń jobasyna balalardy balabaqshaǵa kezekke qoıýdyń biryńǵaı tsıfrlyq bazasyn qurý, tárbıe jumysy tujyrymdamasyn qabyldaý, qosymsha bilim berýdiń biryńǵaı ulttyq portalyn qurý jónindegi is-sharalardy engizý qajet», - dedi Úkimet basshysy.
Ol tapsyrǵan úshinshi mindet – kásiporyndardyń kolledjderdi qamqorlyqqa alýyn damytý jónindegi keshendi jospardyń jobasyn 10 aqpanǵa deıin Úkimet qaraýyna engizý.
«Tórtinshi, Jetekshi sheteldik joǵary oqý oryndarynyń fılıaldaryn ashý jónindegi jol kartasyn 7 aqpanǵa deıin engizý kerek.
Besinshi, Salalyq memlekettik organdarmen birlesip, tehnıkalyq baǵyttaǵy ǵylymı kadrlardy daıarlaýǵa basymdyq berý qajet. Onyń ishinde jas ǵalymdarǵa granttar bólý jáne jyl saıyn jetekshi sheteldik ǵylymı ortalyqtarǵa jiberý jumystarynyń aıasynda da uıymdastyrylý kerek», - degen Álıhan Smaıylov atalǵan jumystardy uıymdastyryp, baqylaýdy orynbasary Eraly Toǵjanovqa tapsyrdy.