Premer-Mınıstr Atyraý oblysyn damytýdyń ózekti máselelerin talqylady
Kezdesýde Qazaqstannyń úshinshi jańǵyrýyn iske asyrý barysy men oblystyń ekonomıkalyq ósimniń jańa modelin qalyptastyrýdaǵy róli talqylandy. Jıyn barysynda oblys ákimi N. Noǵaevtyń jobalyq basqarý aıasynda óńirdiń áleýmettik-ekonomıkalyq damýynyń maqsatty kórsetkishterine qol jetkizý týraly esebi tyńdaldy. Sondaı-aq, otyn-energetıka jáne agroónerkásip keshenderin damytýdyń, bilim berý men densaýlyq saqtaýdy jańǵyrtýdyń, tehnologııalyq jańǵyrtý men «Indýstrııa 4.0» sharalaryn júrgizýdiń, ınvestıtsııalar tartý men óndiristik jumyspen qamtýdyń negizgi baǵyttary qaraldy.
Sonymen qatar, Investıtsııalar jáne damý mınıstri J. Qasymbek, Energetıka mınıstri Q. Bozymbaev, Eńbek jáne halyqty áleýmettik qorǵaý mınıstri M. Ábilqasymova, Bilim jáne ǵylym mınıstri E. Saǵadıev túsinikteme berip ótti. «Atameken» UKP basqarma tóraǵasy A. Myrzahmetov bıznesti damytýdyń ózekti máseleleri týraly baıandady.
Beıne-konferents baılanys júıesi arqyly talqylanǵan máselelerge Premer-Mınıstrdiń orynbasary E. Dosaev, Densaýlyq saqtaý mınıstri E. Birtanov, Qarjy mınıstri B. Sultanov, Ulttyq ekonomıka mınıstri T. Súleımenov, Aýyl sharýashylyǵy vıtse-mınıstri G. Isaeva, Aqparat jáne kommýnıkatsııalar vıtse-mınıstri D. Tuıaqov, Mádenıet jáne sport vıtse-mınıstri E. Qojaǵapanov pikir bildirdi. Spıkerler óz sózderinde óńirdiń ekonomıkalyq ósiminiń qoryn, ákimdik pen Úkimettiń birlesip atqaratyn jumysynyń basymdyqty baǵyttary men mindetterin belgiledi.
Máseleni talqylaý qorytyndysy boıynsha Baqytjan Saǵyntaev ınvestıtsııalardy tartý, servıstik ekonomıkany, ekonomıkanyń jańa salalaryn damytý jumystaryn júrgizýdiń mańyzdylyǵyn atap ótti, sondaı-aq Úkimet pen ákimdikterdiń jańa tehnologııalyq revolıýtsııaǵa daıyn bolýynyń mańyzdylyǵyn atap ótti.
Eske sala keteıik, búgin QR Premer-Mınıstri Memleket basshysynyń tapsyrmasy boıynsha jumys saparymen Atyraý oblysyna keldi. Buǵan deıin Baqytjan Saǵyntaev jumys saparlarymen Ońtústik Qazaqstan jáne Qyzylorda oblystarynda bolyp qaıtty.
Aıta keterligi, Alǵa qoıylǵan mindetterdi oryndaý úshin QR Úkimetinde Jobalyq basqarý júıesi engizildi. Ekonomıkany damytýdyń barlyq asa mańyzdy baǵyttary boıynsha Úkimet jobalarynyń portfeli quryldy. Árbir joba boıynsha maqsatty kórsetkishter men jaýapty tulǵalar bekitilgen, jobalardy iske asyrýdyń naqty nátıjeleri men merzimderi kórsetilgen egjeı-tegjeıli josparlary ázirlendi.