Premer-Mınıstr Aqtóbede káriz tazartý qurylysynyń jaǵdaıymen tanysty

AQTÓBE. QazAqparat – Aqtóbe oblysynda jumys saparymen bolǵan Premer-Mınıstr Álıhan Smaıylov Aqtóbe qalasyndaǵy káriz tazartý qurylystarynyń jaǵdaıymen jáne jańa KTQ salý josparymen tanysty, dep habarlaıdy QazAqparat Úkimettiń baspasóz qyzmetine silteme jasap.

Aqtóbe KTQ paıdalanýǵa 1981 jyly berilgen.

Qazir negizgi qurylystardyń tehnıkalyq jaǵdaıy nashar, 80% tozǵan.

Búginde jańa KTQ salýdyń tehnıkalyq-ekonomıkalyq negizdemesi ázirlenip, qujat memlekettik saraptamadan oń qorytyndy alyp úlgerdi.

Sonymen qatar qujattamany daıyndaýdan bastap, nysandy paıdalanýǵa berýge deıingi is-sharalardy kózdeıtin jobany júzege asyrýdyń jol kartasy bekitildi.

KTQ salý Aqtóbe qalasynyń negizgi ekologııalyq problemalarynyń biri – aýanyń kúkirtti sýtegimen lastanýyna qatysty máseleni sheshýge múmkindik beredi.

Sonymen qatar Premer-Mınıstr Aqtóbe qalasynyń ekologııalyq máselelerin sheshý jergilikti atqarýshy organdardyń basym mindetteriniń biri ekenin atap ótti.

«Kásiporyndardan shyǵatyn zııandy qaldyqtar Aqtóbe qalasyn jaılaǵan jaǵymsyz ıistiń negizgi sebebi bolyp otyr. Qoqys polıgonynda qaıta-qaıta órt shyǵyp, onsyz da kúrdeli ekologııalyq ahýalǵa zııan keltirýde. Qoqys shyǵarý qyzmetteriniń jumysy da aqtóbelikterdiń oryndy narazylyǵyn týdyryp otyr. Osy máselelerdiń barlyǵyna oblys ákimdigi jiti nazar aýdaryp, olardy sheshý úshin jedel sharalar qabyldaýy qajet», - dedi Álıhan Smaıylov.

Úkimet basshysy jyl sońyna deıin jańa káriz tazartý qurylystaryn salýǵa qatysty barlyq qujattamany daıyndaýdy aıaqtap, aldaǵy 2–2,5 jylda qala úshin mańyzdy jobany júzege asyrý qajettigin atap ótti.

Bul másele Úkimettiń baqylaýynda bolady.