Premer-Mınıstr ákimderge jol sapasyn jaqsartý boıynsha tapsyrma berdi

NUR-SULTAN. QazAqparat – QR Premer-Mınıstri Álıhan Smaıylov «Qýatty óńirler – el damýynyń draıveri» ulttyq jobasynyń negizgi kórsetkishterin atady, dep habarlaıdy QazAqparat tilshisi.

«Jalpy, ulttyq jobany iske asyrý eldi mekenderde ınfraqurylymnyń jaı-kúıin jaqsartýǵa, halyqtyń bazalyq qyzmettergeteń qol jetkizýin qamtamasyz etýge múmkindik beredi. Sýmen jabdyqtaýǵa qoljetimdilik 96%-ke qamtamasyz etildi. «Aýyl – el besigi» jobasy boıynsha 480 tirek aýyldar men seriktes aýyldar jańǵyrtyldy. Turǵyn úı qurylysyna 2,4 trln teńge ınvestıtsııa tartyldy. Jumys isteıtin jastar úshin halyqtyń áleýmettik turǵydan osal toptaryna, kóp balaly otbasylarǵa turǵyn úı salynyp jatyr», - dedi Á. Smaıylov Úkimettiń búgingi otyrysynda.

Onyń aıtýynsha, qabyldanatyn sharalardy josparly túrde iske asyrý qalypty kúıdegi respýblıkalyq mańyzy bar joldar úlesin 90%-ke jáne jergilikti mańyzy bar avtojoldar úlesin 80%-ke deıin arttyrýǵa múmkindik berdi.

«Óńir ákimderi qalypty kúıdegi jergilikti mańyzy bar joldar úlesin ulǵaıtýy kerek. Bul rette, turǵyn úı qurylysy salasyndaǵy, «Dıplommen aýylǵa» jobasy boıynsha bıýdjettik kredıt berý jónindegi keıbir kórsetkishterdiń oryndalmaǵanyn, jobalardyń jáne jobalaý-smetalyq qujattamany túzetýdiń qymbattaǵanyn atap ótemin. Jyl sońyna deıin kóp ýaqyt qalǵan joq, sondyqtan osy jumysty jandandyrý qajet. Jobalardyń iske asyrylýy ákimder men jaýapty ortalyq memlekettik organdar basshylarynyń erekshe baqylaýynda bolýy tıis», - dep tapsyrma berdi Úkimet basshysy.