Premer-Mınıstr 40 mlrd dollardyń ımportyn almastyrý mindetti týraly aıtty

NUR-SULTAN. QazAqparat – Otandyq bıznestiń aldynda 40 mlrd dollardyń ımportyn jergilikti ónimmen almastyrý mindeti tur. QR Premer-Mınıstri Álıhan Smaıylov QR Prezıdenti Qasym-Jomart Toqaevtyń iri bıznes ókilderimen kezdesýinde osylaı aıtty, dep habarlaıdy QazAqparat tilshisi.

«Jalpy, bizdiń aldymyzda ınvestıtsııalyq ahýaldy jaqsartý mindeti tur. Básekelestik artyqshylyqtar men áleýetti baǵyttardy eskersek, bizdegi bıznestiń qolynda jyl saıynǵy 40 mıllıard dollardyń ımportyn almastyrý múmkindigi bar. Úkimettiń mindeti – bızneske múmkindikterdi iske asyrýǵa kómektesý», - dedi Premer-Mınıstr.

Sondaı-aq ol iri bıznes ókilderin memlekettik qoldaý sharalaryn usynýdyń tetikteri men rásimderi ashyq bolatynyna sendirdi

«Biz ınvestıtsııalyq ahýaldy jaqsartý jónindegi usynystardy bıznespen talqylaýǵa daıynbyz. Oǵan qosa ekonomıkanyń ónimdiligi men tehnologııalyq qurylymyn tsıfrlyq transformatsııa arqyly arttyrýǵa yqpal etemiz.

Munyń bári, saıyp kelgende, eńbekke jaramdy halyqtyń tabysynyń ósirýi kerek», - dedi Álıhan Smaıylov.