Premer-Mınıstr 2025 jylǵa deıin damý jospary týraly tapsyrma berdi

NUR-SULTAN. QazAqparat – QR Premer-Mınıstri Asqar Mamın Reformalar jónindegi joǵary keńes otyrysy boıynsha tapsyrmalar berdi, dep habarlaıdy QazAqparat tilshisi.

«Reformalar jónindegi joǵarǵy keńestiń otyrysynda birqatar strategııalyq qujattar maquldandy jáne birqatar máselelerdi jedel oryndaý qajet. Joǵarǵy keńestegi talqylaýdy eskere otyryp, Ulttyq ekonomıka mınıstrligine Strategııalyq josparlaý jáne reformalar agenttigimen birlesip, bir apta merzimde Memlekettik josparlaý júıesiniń jobasyn Prezıdent Ákimshiligimen pysyqtaýdy tapsyramyn», - dep atap ótti A. Mamın Úkimettiń búgingi otyrysynda.

Ekinshiden, «Qazaqstan-2050» strategııasy – Elbasy Nursultan Nazarbaevtyń mańyzdy bastamasy ári strategııalyq josparlaý júıesiniń negizgi qujaty, onda el damýynyń uzaq merzimdi basymdyqtary aıqyndalǵan.

«Bul qujatty júıeli túrde iske asyrý úshin «Ulttyq basymdyqtar» quraly engiziletin bolady, ol «2050 Strategııasynyń mindetterin eskere otyryp, qysqa merzimdi kezeńderde el damýynyń negizgi basymdyqtaryn belgileıdi. Strategııalyq josparlaý agenttigi Ulttyq ekonomıka mınıstrligimen birge 10 aqpanǵa deıin Ulttyq basymdyqtardy qabyldaý týraly tıisti jarlyq jobasyn engizsin», - dedi Premer-Mınıstr.

Sonymen birge, Úkimet otyrysynda eldiń 2025 jylǵa deıingi damýynyń ulttyq jospary qaraldy. Ol Elbasy Nursultan Nazarbaevtyń strategııalyq bastamalary – «Qazaqstan-2050» Strategııasyn, 5 ınstıtýtsıonaldyq reformany iske asyrý jónindegi 100 naqty qadamdy, jáne de Memleket basshysy Qasym-Jomart Toqaevtyń Joldaýy men «NurOtan» partııasynyń saılaýaldy baǵdarlamasyn iske asyrý úshin ázirlengen.

«Bul qujat ekonomıkanyń ornyqty ári sapaly ósýin qamtamasyz etý arqyly halyqtyń áleýmettik ál-aýqatyn arttyrý úshin Úkimet jumysynyń orta merzimdi perspektıvadaǵy basty baǵdary bolmaq. Ulttyq ekonomıka mınıstrligi Strategııalyq josparlaý agenttigimen birge 10 aqpanǵa deıin eldiń 2025 jylǵa deıingi damýynyń ulttyq josparyn qabyldaý týraly tıisti jarlyq jobasyn engizsin. Strategııalyq josparlaý agenttigi Ulttyq ekonomıka mınıstrligi jáne múddeli memlekettik organdarmen birge bir aı merzimde Ulttyq jobalardyń tizimin qalyptastyrsyn», - dep tapsyrma berdi Asqar Mamın.