Premer-lıga oıynynda «Jetisý» «Oqjetpesti» tize búktirdi

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 8-týrynda «Jetisý» «Oqjetpesti» jeńdi , dep habarlaıdy QazAqparat tilshisi.

Komandalar týrnır kestesiniń ortańǵy bóliginde keledi. Jaǵdaıdy jaqsartý úshin ekeýine de úsh upaı qajet ekeni belgili.

Oıyn barysynda komandalar bir-biriniń qaqpasy mańynda jıi boı kórsetti.

Kezdesý taǵdyryn 95-mınýtta taldyqorǵandyq klýbtan Iovan Stoıanovıch soqqan jalǵyz gol sheshti.

Osylaısha «Jetisý» qarsylasynan 1:0 esebimen basym tústi.

Endi «Kaspıı» (Aqtaý) men «Atyraý», «Shahter» (Qaraǵandy) men «Qyzyljar» (Petropavl) komandalary oınaıdy.

Eske salsaq, 6 mamyrda «Tobyl» óz alańynda «Qaıratqa» 2:3 esebimen jol berse, «Astana» elordada «Maqtaraldan» 2:0, «Aqtóbe» «Aqsýdan» 2:1, «Ordabasy» «Qaısardan» 4:0 esebimen basym tústi.