Premer-lıga: «Astana» «Qyzyljardan» basym tústi

ASTANA. QazAqparat – Búgin fýtboldan Premer-lıga komandalary arasyndaǵy el birinshiliginiń 10-týrynyń alǵashqy oıyn kúni aıaqtaldy, dep habarlaıdy QazAqparat tilshisi.

Atalǵan týrdaǵy birinshi kezdesý «Jetisý» (Taldyqorǵan) men «Atyraý» komandalary arasynda ótti. Oıyn barysynda atyraýlyq klýb sapynan Evgenıı Kozlov – 5, Ngýngýsı Effıong – 24, Igor Stasevıch 58-mınýtta gol soqty.

Osylaısha «Jetisý» qarsylasyna 0:3 esebimen jol berdi.

Al «Shahter» (Qaraǵandy) – «Aqsý» (Pavlodar oblysy) kezdesýinde alań ıeleri 2:1 esebimen basym tústi. Olardyń qatarynan Ivan Svırıdov – 44, Maksım Galkın 91-mınýtta mergendik tanytsa, oǵan Damır Marat 48-mınýtta bir golmen jaýap qaıyrdy.

Sondaı-aq elordalyq «Astana» óz alańynda Petropavldyń «Qyzyljarynan» 3:2 esebimen basym tústi. Aldymen «Astana» sapynan Varazdat Aroıan – 17, Abat Aıymbetov 27-mınýtta gol soqty. Al «Qyzyljar» oıynshylary Vıtor Rodrıges Hose – 39, Ivan Graf 89-mınýtta qaqpany dál kózdedi, esep – 2:2. Jeńis golyn 97-mınýtta elordalyq Elhan Astanov soqty.

Endi 21 mamyrda «Tobyl» (Qostanaı) men «Maqtaral» (Túrkistan oblysy), «Qaırat» (Almaty) pen «Qaısar» (Qyzylorda), «Aqtóbe» men «Kaspıı» (Aqtaý) jasyl alańǵa shyǵady.

Atalǵan týrdy saǵat 21:00-de «Ordabasy» (Shymkent) men «Oqjetpes» (Kókshetaý) komandalary túıindeıdi.

Eske salsaq, fýtboldan birinshi lıgada «Taraz» qatarynan besinshi márte jeńildi.