Praımerız jastarǵa úlken múmkindik syılady – Aqkerbez Orash

SEMEI. QazAqparat – «Nur Otan» partııasy janyndaǵy «Jas Otan» jastar qanaty ShQOF Semeı qalalyq bólimshesiniń birinshi orynbasary Aqkerbez Orash praımerızge qatysty pikir bildirdi, dep habarlaıdy QazAqparat tilshisi.

«Birinshi kezekte praımerız jastarǵa úlken múmkindik syılady. Elimizge jańa kóshbasshylar, myqty lıderler qajet. Praımerızdiń de basty mindeti osy - bolashaǵynan zor úmit kúttiretin jastardy memlekettik qyzmetke, bılik basyndaǵy joǵary laýazymdarǵa tartý», - dedi Aqkerbez Orash.

Onyń aıtýynsha, jeńiske jetpegen kandıdattar da partııanyń kadrlyq rezervinde qalady.

«Qatysýshylar pikirtalasta ózderiniń aldaǵy jospar ymen bólisýge, turyp jatqan óńiriniń damý jolyna qatysty baǵdarlama usynyp, túıini tarqamaǵan túıtkildi máselelerdi kóterýge múmkindik aldy. Naqty aısaq, kandıdattar bilim, medıtsına, muqtaj jandarǵa áleýmettik kómek kórsetý, kásipkerlik salalaryna jáne ekologııaǵa qatysty problemalardy ashyq aıtty», - deıdi partııa ókili.

Óz sózinde ol onlaın daýys berýdiń ádil ótkenin, halyqtyń saılaý nátıjesin sát saıyn qadaǵalap otyrǵanyn jetkizdi.

«Qazir eldiń kózi ashyq. Eshkimdi aldaı almaısyń. Ár azamat óz tańdaýyn jasaǵan soń birden kandıdatqa onyń daýysy qosylyp otyrdy. Bireýdiń daýysyn alyp tastaý nemese daýys qosyp jiberý degen bolǵan joq. Meniń oıymsha, saılaýdy osyndaı formatta ótkizgen óte tıimdi. Sebebi dúıim jurt saılaý ýchaskesine baryp júrmeı, úıinde otyryp-aq daýys bere alady», - dedi Aqkerbez Orash.