Praımerız: Qostanaı oblysynda 1 500 partııa múshesi daýys berdi

QOSTANAI. QazAqparat – Búgin Nur Otan partııasy praımerıziniń daýys berý kezeńinde 1500-nan astam partııa múshesi óz tańdaýyn jasady, dep habarlaıdy QazAqparat tilshisi.

Nur Otan partııasynyń baspasóz qyzmeti málim etkendeı, Qostanaı oblysy boıynsha partııaishilik saılaýǵa 800 adam qatysyp jatyr.

«7 qyrkúıekten bastap árbir kandıdat aýqymdy úgit-nasıhat jumysyn júrgizdi. Olar bastaýysh partııa uıymy múshelerimen kezdesip, turǵyndardan túsken shaǵym-usynystardy jınap, jarııa pikirtalastarǵa qatysty. Al 1-3 qazan aralyǵynda mobıldi qosymsha jáne arnaıy veb-portal primaries.kz arqyly elektrondy daýys berýdi ótkizý josparlanyp otyr. Daýys berýdiń sońǵy kúni, 3 qazan kúni bastaýysh partııa uıymdarynyń bazasynda saılaý ýchaskeleri ashylady. Internet jelisi joq eldi meken turǵyndary saılaý ýchaskelerine kelip, qaǵaz bıýlletenmen daýys berýine bolady», - dedi agenttik tilshisine Nur Otan partııasy oblystyq fılıalynyń baspasóz hatshysy Ásel Ahan.

Aıta keteıik, Qostanaı oblysy boıynsha 156 daýys berý ýchaskesi ornalastyryldy. Daýys berý barysynda barlyq sanıtarlyq normalar saqtalady.