Praımerız elimizdiń saıası júıesin evolıýtsııalyq turǵyda damytýdyń alǵysharty - Erlan Saırov

NUR-SULTAN. QazAqparat - «Nur Otan» partııasynyń praımerızi elimizdiń saıası júıesin evolıýtsııalyq turǵyda damytýdyń alǵysharty. Bul týraly QR Prezıdenti janyndaǵy Ulttyq qoǵamdyq senim keńesiniń múshesi, saıasattanýshy Erlan Saırov aıtty, dep habarlaıdy QazAqparat tilshisi.

«Barshamyzǵa belgili, búgingi tańda dúnıejúzinde ártúrli áleýmettik, ekonomıkalyq protsester júrip jatyr. Memleket ınstıtýtynyń ózi qazir transformatsııaǵa ushyraýda. Mine, osyndaı protsester Qazaqstanǵa da kelip jetti. Qazaqstan halqynyń demokratııaǵa, prıýralızmge degen suranysy artyp keledi. Osy turǵyda «Nur Otan« partııasynyń praımerızi elimizdiń saıası júıesin evolıýtsııalyq turǵyda damytýdyń alǵysharty dep qarastyrýǵa bolady», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Sondyqtan saıasattanýshy bul praımerız ádil, taza, transparentti ótýi óte mańyzdy ekendigin basa aıtty.

«Óıtkeni, búgingi tańda dúnıejúzi sııaqty Qazaqstanda da bılikke, sonymen birge saıası partııalarǵa senimsizdik bar. Senimdi qalyptastyrý úshin praımerızdi ádil jáne taza ótkizý kerek. Sonymen birge jastardy tartý qajet. Jastar - elimizdiń damýynyń, ary qaraı reforma jasaýynyń negizgi draıveri», - dedi Erlan Saırov.