Praımerız: Aqtóbede shalǵaı aýdandaǵy partııa músheleri daýys berip jatyr
Mártók aýdanynda «Nur Otan» partııasynyń 1 017 múshesi bar. Olar 9 ýchaskede onlaın daýys bere alady.
«Dostyq aýylynyń mektebinde muǵalimmin. Qosymsha sharýashylyqpen aınalysyp, qoı jáne qoıan basyn kóbeıtip otyrmyn. Elimizdegi qazirgi jaǵdaıdy eskere otyryp, onlaın daýys berýdi uıǵardym. Bári tıimdi uıymdastyrylǵan. Ózim de, aýyldyqtar da óte rıza. Eshqaıda sabylyp júrýdiń qajeti joq. Árkim óz úıinen tańdaýyn jasaı aldy. Mysaly, men aýdan ekonomıkasyna paıdasyn tıgizer, saıası-qoǵamdyq ómirde oıyp turyp oryn alar belsendilerdiń jeńiske jetip, el ıgiligi úshin jumys isteýin qoldap, daýys berdim», - dedi Málik Sársenov.
Aıta keteıik, oblys boıynsha jas maman Altynaı Nurlanova alǵash bop tańdaýyn jasaǵan. Ol Shalqar aýdanynda turady. Ýaqytqa da, jerdiń shalǵaılyǵyna da qaramastan tıimdi júıemen daýys bergenine dán rıza.
«Ózim aǵylshyn tiliniń muǵalimimin. Sheteldiń ozyq tájirıbesinen habarym bar. Elimizde praımerız ótetinin estigende eleń ettim. Jańalyqtardy áleýmettik jeliden baqyladym. Uıaly telefonyma «Praımerız» qosymshasyn júktep alyp, daýys berýdi asyǵa kúttim. Onlaın daýys berý qyzyqty ári tańdaǵan kandıdatyma tezirek qoldaý bildirgim keldi», - dedi ol.
Jalpy Shalqar aýdanynan «Nur Otan» praımerızine 30 kandıdat tirkeldi. Onyń 26 paıyzy jasy 35-ke tolmaǵan azamat.