Praımerız: Aqtóbede 27 myńǵa jýyq partııa múshesi óz tańdaýyn jasady

AQTÓBE. QazAqparat - Búgin partııanyń Aqtóbe oblystyq fılıaly tóraǵasy, oblys ákimi Ońdasyn Orazalın «Nur Otan» praımerızine qatysqan kandıdattarmen kezdesti. Ózderine jáne partııaǵa senim artyp, partııaishilik saılaýǵa belsendi atsalysqandary úshin olarǵa alǵys aıtty, dep habarlaıdy QazAqparat tilshisi.

«Qoǵam ózgerip, ómirimizge kún saıyn bir jańalyq engizilip keledi. Mundaı formattaǵy partııaishilik irikteý elimizde alǵash ret ótkizilip otyr. Saıası jańashyldyq halyq tarapynan úlken qyzyǵýshylyq týdyryp, el turǵyndary daýys berýde belsendilik tanytty. Aqtóbelik kandıdattar da el aldynda ózderiniń baǵdarlamalaryn tanystyryp, memleketimizdiń damýyna múddeli, jigerli, bilimdi ári belsendi azamattar ekendikterin kórsetti. Tirkelgen úmitkerler úgit-nasıhat jumystaryn ashyq ári belsendi júrgizdi. Bul «Nur Otan» partııasynyń Tóraǵasy, Elbasynyń bastamasymen kóterilgen jańashyldyqqa jáne partııa tarapynan atqarylyp jatqan jumystarǵa halyqtyń zor seniminiń odan ári artqanyn bildiredi», - dedi aımaq basshysy O.Orazalın.

Partııaishilik saılaýda óńirimizden 460 kandıdat baq synady. Olardyń 36,7% áıel, 28% 35 jasqa deıingi jastar. Bastaýysh partııa uıymdarynan kandıdattardyń 50,4% usynylsa, 49,6% ózin ózi usyndy. Tirkelgen úmitkerler úgit-nasıhatty belsendi júrgizdi. Olar 6 myńnan astam kezdesý ótkizip, baǵdarlamasyn usyndy. Onyń 642-si onlaın formatynda uıymdastyryldy.

«Partııaishilik saılaýǵa belgili tulǵalar da, myqty kásipkerler de, jalyndy jastar da qatysty. Praımerız halyq arasyndaǵy aýqymdy máselelermen tanysýǵa múmkindik berdi. Partııalastarmen kezdesýde jáne jarııapikirsaıys barysynda halyqtyń áleýmettik máselelerin ashyq kótere bildik. Daýys berý ashyq ári ádil ótti», - dedi úmitker Juldyz Qojabekova.