Praımerız: Aqmola oblysynyń partııa músheleri jazalandy
Partııanyń baspasóz qyzmetiniń málimetinshe, Aqmola oblysy Sandyqtaý aýdanyndaǵy «Bilim» BPU tóraǵasynyń orynbasary «Nur Otan» partııasynyń praımerızin ótkizý erejesin buzyp, jappaı daýys berýdi uıymdastyrýǵa shaqyrǵan.
30 qyrkúıekte osy másele boıynsha partııanyń Aqmola oblystyq fılıalynda partııalyq baqylaý komıtetiniń otyrysy ótti. Onda Sandyqtaý aýmaqtyq fılıaly Saıası keńesiniń bıýrosyna partııalyq jaýapkershilik týraly máseleni qaraýdy jáne Sandyqtaý aýmaqtyq fılıaly tóraǵasynyń birinshi orynbasary L. A. Lovıagınaǵa «eskertý» partııalyq jazalaý sharasyn, sondaı – aq «Bilim» BPU tóraǵasy J. J. Qaıyrymdenov pen praımerız erejesin buzǵany úshin «Bilim» BPU tóraǵasynyń orynbasary ıÝ.Barahoevaǵa sógis túrindegi partııalyq jazany qoldanýdy usyný týraly sheshim qabyldandy.
«Nur Otan» baspasóz qyzmeti Elbasy, Partııa Lıderi Nursultan Nazarbaevtyń partııa ishindegi saılaýda ashyq, anyq jáne ádil daýys berýdi qamtamasyz etý qajettigi týraly tapsyrmasyn oryndaý aıasynda Ortalyq apparat jergilikti jerlerdegi osyndaı «áreketterdiń» qatań túrde jolyn kesetinin atap ótti.
Praımerız ótkizý erejesin buzý derekteri boıynsha 8 (800) 080 4441 jedel jelisine (qońyraý shalý tegin) nemese komek@nurotan.kz. elektrondyq poshta arqyly habarlasýǵa bolady. Barlyq jaıtterdi Partııalyq baqylaý komıteti egjeı-tegjeıli zertteıdi. Kinálilerge partııadan shyǵarýǵa deıin qatań sharalar qabyldanatyn bolady.