Praktık-mamandardy daıarlaýǵa arnalǵan ilki joba qalaı júzege asyrylýda - ǵylym vıtse-mınıstri

ASTANA. QazAqparat – Bakalavrıat stýdentteriniń praktıkada bilim alýyn qamtamasyz etetin pılottyq joba elimizdiń 7 ýnıversıtetinde iske qosyldy.

Bul týraly Ortalyq kommýnıkatsııalar qyzmetinde uıymdastyrylǵan brıfıngte Ǵylym jáne joǵary bilim vıtse-mınıstri Qýanysh Erǵalıev aıtty, dep habarlaıdy QazAqparat tilshisi.

«Eńbek naryǵyn praktık-mamandarmen qamtamasyz etý úshin osy jyldyń qyrkúıek aıynan bastap, pılottyq rejımde joǵary bilim dárejesinde qoldanbaly bakalavrıat baǵdarlamasy júzege asyrylýda. Pılottyq joba 7 ýnıversıtet negizinde iske asyrylyp jatyr. Bul baǵdarlama negizinde jumys berýshilermen tyǵyz baılanys ornatylyp otyr, praktıkada bilim alý prıntsıpi qoldanylýda.

Sonymen qatar, osy jyldyń qyrkúıek aıynan bastap, pılottyq rejımde 4 ýnıversıtet negizinde ıntegraldy GPA engizildi. Oqytýdyń nátıjesi - akademııalyq, ǵylymı-zertteý jáne áleýmettik GPA sımbıozy bolady. Bul shara stýdentterdiń ýnıversıtetterdegi startap-jobalarǵa, jobalyq, ǵylymı-zertteý, sporttyq, áleýmettik jáne volonterlik jumystaryna qatysýyna yqpal etedi», - dep atap ótti Qýanysh Erǵalıev.

Qosa ketsek, buǵan deıin vıtse-mınıstr bıyl elimizdiń joǵary oqý oryndarynda bilim alýy úshin 490 sheteldikke grant berilgenin málimdegen edi.